- Auglýsing -
- Ekki gekk rófan í fyrsta leik EHV Aue undir stjórn Ólafs Stefánssonar þegar liðið mætti TuS Vinnhorst á heimavelli í gær í viðureign tveggja neðstu liða 2. deildar þýska handboltans í karlaflokki. Vinnhorst vann með fimm marka mun, 28:23, eftir að hafa verið yfir, 13:10, að loknum fyrri hálfleik. EHV Aue féll þar með með niður í neðsta sæti deildarinnar en Vinnhorst færðist upp í næst neðsta sæti.
- Sveinbjörn Pétursson varði sjö skot í marki EHV Aue í leiknum en hann var í marki liðsins í nærri 40 mínútur. Ólafur Stefánsson tók við þjálfun EHV Aue í upphafi síðustu viku og hefur ekki haft langan tíma til þess að snúa lukkuhjólinu liðinu í hag.
- Stöðuna í 2. deild þýska handknattleiksins og í fleiri deildum í evrópskum handknattleik er að finna hér.
- Dagur Gautason skoraði sex mörk fyrir ØIF Arendal þegar liðið vann Fjellhammer, 30:26, á heimavelli í norsku úrvalsdeildinni í handknattleik í gær. Hafþór Már Vignisson var ekki með Arendal í leiknum og var þetta annar leikurinn í röð sem hann missir af. Árni Bergur Sigurbergsson skoraði ekki mark fyrir Arendal í leiknum.
- Ásgeir Snær Vignisson skoraði þrjú mörk fyrir Fjellhammer sem er í 12. sæti af 14 liðum norsku úrvalsdeildinni. ØIF Arendal situr í fjórða sæti með 15 stig, er fjórum stigum á eftir Kolstad sem er er efst.
- Róbert Sigurðarson skoraði einu sinni fyrir Drammen í jafntefli liðsins í heimsókn til Kristiansand, 29:29, í norsku úrvalsdeildinni í gær. Viktor Petersen Norberg skoraði tvö mörk fyrir Drammenliðið sem er í þriðja sæti með 16 stig.
- Stöðuna í norsku úrvalsdeildinni í karlaflokki og í fleiri deildum í evrópskum handknattleik er að finna hér.
- Fredrikstad Bkl., liðið sem Elías Már Halldórsson þjálfar, gerði jafntefli á heimavelli í Gjerpen, 26:26, í norsku úrvalsdeildinni í gær. Fredrikstad Bkl. situr í þriðja sæti deildinnar með 17 stig að loknum 12 leikjum. Vipers Kristiansand er efst og Storhamar er í öðru sæti en stöðuna er að finna hér.
- Dana Björg Guðmundsdóttir skoraði þrjú af mörkum Volda í sigri á Ålgård, 27:26, í hörkuleik á heimavelli í næst efstu deild kvenna í handknattleik í Noregi í gær. Volda er áfram í öðru sæti deildarinnar, hefur 16 stig að loknum 11 leikjum. Haslum er í efsta sæti með 18 stig. Flint Tønsberg stendur vel að vígi í þriðja sæti með 15 stig eftir níu leiki.
- Kristján Örn Kristjánsson, Donni, var ekki í leikmannahópi PAUC á heimavelli í gær þegar liðið tapaði fyrir meistaraliði PSG, 39:31, í frönsku 1. deildinni í handknattleik.
- Stöðuna í 1. deild franska handknattleiksins og í fleiri deildum í evrópskum handknattleik er að finna hér.
- Auglýsing -
