- Auglýsing -
- Ekkert lát er á sigurgöngu Orra Freys Þorkelssonar og félaga í Sporting Lissabon. Í gær vann Sporting öruggan sigur á ABC Braga, 33:23, í Braga í fyrstu umferð úrslitakeppninnar en í henni reyna með sér fjögur efstu lið efstu deildar. Orri Freyr skoraði fjögur mörk. Næsti leikur Sporting verður við Benfica, hitt liðið í Lissabon, á laugardaginn. Stiven Tobar Valencia leikur með Benfica.
- Svissneska meistaraliðið Kadetten Schaffhausen vann fyrstu viðureign sína í undanúrslitum úrslitakeppninnar í Sviss í gær þegar liðsmenn Pfadi Winterthur komu í heimsókn, 35:29. Óðinn Þór Ríkharðsson skoraði sjö mörk og var næst markahæstur. Næst mætast liðin í Winterthur á miðvikudaginn. Vinna þarf þrjá leiki til þess að komast í úrslitarimmuna.
- Leikmenn TTH Holstebro halda í vonina um að sleppa við umspil við lið úr næst efstu deild danska handknattleiksins eftir að þeir unnu Kolding, 35:31, á heimavelli í gær í næst síðasta leiknum í fimm liða riðli í neðri hlutanum. Arnór Atlason er þjálfari TTH Holstebro.
- Stöðuna í riðlunum í úrslitakeppni danska handknatteiksins í karlaflokki er að finna hér.
- Elvar Ásgeirsson skoraði tvö mörk og átti tvær stoðsendingar þegar Ribe-Esbjerg tapaði fyrir Mors-Thy, 33:28, í úrslitakeppni liðanna í efri hluta dönsku úrvalsdeildarinnar í gær. Leikurinn fór fram í Esbjerg.
- Ágúst Elí Björgvinsson varði tvö skot af 10 í marki Ribe–Esbjerg á þeim tíma sem hann fékk til að láta ljós sitt skína. Ágúst Elí skoraði eitt mark en hann skorar með reglubundnum hætti.
- Fyrri hluti úrslitakeppninnar efri hlutanum í dönsku úrvalsdeildinni í karlaflokki er að baki. Stöðuna er m.a. að finna hér.
- Anderstorps SK, liðið sem Bjarki Finnbogason leikur með í næst efstu deild sænska karlahandboltans, vann Örebro á heimavelli í gær, 29:22, í umspili um veru í deildinni á næstu leiktíð. Liðin hafa þar með unnið einn leik hvort og mætast í oddaleik á heimavelli Anderstorps SK á miðvikudaginn. Bjarki var fjarri góðu gamni í leiknum í gær.
- Auglýsing -
