- Auglýsing -
- Orri Freyr Þorkelsson skoraði þrjú mörk í þremur skotum þegar lið hans Sporting Lissabon vann Madeira Andebol, 32:24, á heimavelli í 14. umferð portúgölsku 1. deildarinnar í gær. Sporting er efst með fullt hús stiga.
- Stiven Tobar Valencia skoraði eitt úr í tveimur tilraunum þegar Benfica lagði FC Gaia Empril, 29:26, á útivelli í gær í portúgölsku 1. deildinni í handknattleik. Benfica er í þriðja sæti deildarinnar, nokkuð á eftir tveimur efstu liðunum, Sporting og Porto.
- Bjarki Már Elísson skoraði fjögur mörk þegar Telekom Veszprém lagði Balatonfüredi KSE, 46:21, í ungversku 1. deildinni í gær. Leikið var á heimavelli Balatonfüredi KSE. Telekom Veszprém er efst í deildinni þegar 13 umferðir eru að baki með 26 stig.
- Haukur Þrastarson skoraði fjórum sinnum fyrir Industria Kielce þegar liðið vann Wybrzeże Gdańsk, 34:30, á heimavelli í pólsku úrvalsdeildinni í handknattleik í gær. Kielce er efst í deildinni og hefur ekki tapað stigi ennþá eins og sjá má á stöðutöflunni sem m.a. er að finna hér ásamt fleiri stöðutöflum í evrópskum handknattleik.
- Ýmir Örn Gíslason skoraði eitt mark en Arnór Snær Óskarsson ekkert þegar lið þeirra Rhein-Neckar Löwen gerði jafntefli við Lemgo, 34:34, í þýsku 1. deildinni í handknattlleik í gær en leikið var í SAP-Arena í Mannheim. Rhein-Neckar Löwen er í sjötta sæti deildarinnar með 18 stig eftir 16 leiki, fjórum stigum á eftir Kiel sem lagði Erlangen í gær, 31:27.
- Ásgeir Snær Vignisson og félagar í Fjellhammer ráku af sér slyðruorðið í gær þegar þeir unnu Kristiansand Topphåndball með 10 marka mun á útivelli í sænsku úrvalsdeildinni í handknattleik, 38:28. Ásgeir Snær skoraði eitt mark í leiknum. Ekki hefur gengið sem skildi hjá Fjellhammer í vetur en talsvert var lagt í liðið og ekki síst þjálfarateymið. Sigurinn í gær færði liðið upp í 11. sæti af 14 með níu stig í 13 leikjum.
- Arnór Atlason og liðsmenn hans í TTH Holstebro töpuðu í gær á heimavelli fyrir Bjerringbro/Silkeborg, 35:28, í 16. umferð dönsku úrvalsdeildinni í handknattleik. Holstebro situr í 9. sæti af 14 liðum deildarinnar. Tvær umferðir fara fram á næstu dögum í deildinni áður en gert verður hlé á keppni fram í byrjun febrúar vegna Evrópumóts karla í handknattleik sem tekur yfir nær allan janúarmánuð.
- Tryggvi Þórisson stóð aðalllega vaktina í vörn IK Sävehof þegar liðið vann Kristianstad, 29:24, á útivelli í sænsku úrvalsdeildinni í handknattleik í gær. Hann skoraði alltént ekki mark. IK Sävehof er í öðru sæti með 18 stig eftir 11 leiki, er stigi og einum leik á eftir Skövde sem trónir á toppnum um þessar mundir eins og sjá má hér.
- Óðinn Þór Ríkharðsson skoraði þrjú mörk, tvö þeirra úr vítaköstum í átta marka sigri Kadetten Schaffhausen, 35:27, á HSC Suhr Aarau í svissnesku A-deildinni í gær. Kadetten Schaffhausen er efst sem fyrr, sjö stig á undan Amicita Zürich sem er í öðru sæti. Stöðuna í deildinni er m.a. að finna hér.
- Auglýsing -
