- Auglýsing -
- Orri Freyr Þorkelsson skoraði þrjú mörk í fjórum skotum þegar Sporting hélt sigurgöngu sinni áfram í portúgölsku 1. deildinni í handknattleik í gær. Sporting vann Belenenses með miklum yfirburðum, 37:23, á útivelli. Sporting er efst með fullt hús stiga, 51, að loknum 17 leikjum. Porto er þremur stigum á eftir.
- Stiven Tobar Valencia skoraði fjögur mörk í fimm skotum í 10 marka sigri Benfica á Artística de Avanca, 42:32, í portúgölsku 1. deildinni í gærkvöld. Benfica situr í þriðja sæti deildinnar átta stigum á eftir Sporting. Stöðuna í portúgölsku 1. deildinni og í fleiri deildum evrópsks handknattleiks er að finna hér.
- Oddur Gretarsson var ekki í leikmannahópi Balingen–Weilstetten þegar liðið vann kærkominn sigur á Göppingen, 30:29, á heimavelli í þýsku 1. deildinni í handknattleik í gærkvöld. Daníel Þór Ingason lék með Balingen en skoraði ekki mark. Balingen er áfram í neðsta sæti deildarinnar með 9 stig eftir 20 leiki, fjórum stigum á eftir Eisenach sem er í næst neðsta sæti.
- Eisenach tapaði á heimavelli fyrir Gummersbach í gærkvöld, 26:24. Elliði Snær Viðarsson skoraði eitt mark fyrir Gummersbach. Guðjón Valur Sigurðsson er þjálfari liðsins sem er í 7. sæti með 20 stig að loknum 20 leikjum.
- Óðinn Þór Ríkharðsson var ekki með Kadetten Schaffhausen í gær í eins marks sigri á HSC Kreuzlingen, 30:29, á útivelli í svissnesku A-deildinni í handknattleik. Þetta er a.m.k. annar leikurinn í röð sem Óðinn Þór missir af hjá Kadetten. Liðið er efst í deildinni með 39 stig að loknum 22 leikjum, átta stigum á undan HC Kriens.
- Alpla Hard, liðið sem Hannes Jón Jónsson þjálfar, gerði jafntefli vð Voslauser, 26:26, á útivelli í austurrísku 1. deildinni í handknattleik í gær. Hard var með fimm marka forskot að loknum fyrri hálfleik, 17:12. Hard situr í öðru sæti deildarinnar með 23 stig að loknum 15 leikjum. Sjö umferðir eru eftir af deildarkeppninni áður en við tekur úrslitakeppni átta efstu liðanna með líku sniði og er hér á landi í Olísdeild karla.
- Auglýsing -
