- Auglýsing -
- Róbert Sigurðarson og félagar í Drammen treystu stöðu sína á meðal liðanna í efstu sætum norsku úrvalsdeildarinnar í gærkvöld með sigri á Halden 25:24, á heimavelli í 13. umferð. Róbert skoraði ekki mark en tók vel á því í vörninni en slapp ágætlega við refsingar, fékk eitt gult spjald. Hinn hálfíslenski Viktor Petersen Norberg var markahæstur hjá Drammen með sjö mörk.
- Drammen er í öðru sæti norsku úrvalsdeildarinnar með 20 stig eftir 13 leiki. Kolstad er stigi ofar og á auk þess leik inni. Stöðuna í norsku úrvalsdeildinni er að finna hér.
- Birta Rún Grétarsdóttir var ekki í leikmannahópi Fjellhammer þegar liðið vann Storhamar Håndball 2 á útivelli í næst efstu deild norska handknattleiksins í gær, 27:25. Fjellhammer er í fjórða sæti með 12 stig eftir 12 leiki, átta stigum á eftir Halden sem er efst.
- Sænski línumaðurinn Andreas Nilsson er sagður yfirgefa Veszprém í sumar eftir 10 ára veru. Þessu er haldið fram í Skånesport í gær og sagt að Nilsson hafi náð samkomulagi við Veszprém um að síðasta ár hans af samningi við félagið verði strikað út. Samningur sænska línumannsins sem gengur undir gælunafninu stykkið, er til ársins 2025.
- Sænskir fjölmiðlar hafa áður sagt frá því að Nilsson hafi keypt hús í nágrenni Gautaborgar sem hann hyggst skjóta rótum. Getum hefur verið leitt að því að Nilsson taki upp þráðinn með Önnereds í sænsku úrvalsdeildinni. Nýlega gaf Nilsson kost á sér í sænska landsliðið eftir tveggja ára fjarveru eftir að honum og Glenn Solberg landsliðsþjálfara sinnaðist í aðdraganda HM 2021.
- Þýska handknattleiksliðið Rhein-Neckar Löwen sem Arnór Snær Óskarsson og Ýmir Örn Gíslason leika með hefur samið við þýsku landsliðsmennina Sebastian Heymann og Tim Nothdurft frá og með næsta sumri. Sá fyrrnefndi kemur til liðsins frá Göppingen en Nothdruft er nú með Bergischer HC.
- Ekkert fararsnið er á norska landsliðmanninum Petter Øverby. Honum líkar svo vel við lífið hjá THW Kiel að hann hefur skrifað undir nýjan samning til næstu þriggja ára.
- Auglýsing -
