- Auglýsing -
- Róbert Sigurðarson var fastur fyrir í vörn Drammen í gær þegar liðið vann Viking TIF, 35:33, í 12. umferð norsku úrvalsdeildarinnar í handknattleik karla en leikið var á heimavelli Viking. Drammen var fjórum mörkum undir að loknum fyrri hálfleik, 21:17. Liðinu tókst að snúa hressilega við taflinu í síðari hálfleik.
- Róbert skoraði ekki mark en var einu sinni vikið af leikvelli í tvær mínútur. Viktor Petersen Norberg skoraði sex mörk fyrir Drammen. Nicholas Satchwell markvörður færeyska landsliðsins og leikmaður KA til marga ára, var ekki í leikmannahópi Viking að þessu sinni.
- Drammen er eftir sem áður í þriðja sæti norsku úrvalsdeildarinnar en stöðuna í heild sinni er að finna hér.
- Nýr þjálfari tekur við þýska handknattleiksliðinu Balingen-Weilstetten sem Daníel Þór Ingason og Oddur Gretarsson leika með með. Félagið tilkynnti í gær að ekki standi til að endurnýja samning sinn við Jens Bürkle sem þjálfað hefur liðið frá 2017. Skiptir engu máli hvort Balingen heldur sæti sínu í 1. deildinni eða ekki en það rekur lestina um þessar mundir.
- Bürkle tók við þjálfun liðsins af Rúnari Sigtryggssyni á sínum tíma. Ekki er ljóst hver tekur við af þjálfun Balingen sem hefur rokkað milli efstu og næst efstu deildar á síðustu árum, sannkallað jójó-lið.
- Símon Michael Guðjónsson vinstri hornamaður FH var óheppinn í gær. Honum var í tvígang vikið af leikvelli í viðureign FH og Gróttu í Olísdeild karla. Í bæði skiptin vegna þess að skot hans snertu höfuð markvarða Gróttu. Í fyrra skiptið var Shuhei Narayama í marki Gróttu og Einar Baldvin Baldvinsson í síðara sinn.
- Arnór Atlason og lærisveinar hans í TTH Holstebro gerðu jafntefli við SønderjyskE, 24:24, á heimavelli í dönsku úrvalsdeildinni í handknattleik í gærkvöld. Liðin eru jöfn í 11. og 12. sæti deildarinnar með 10 stig hvort. Stöðuna í dönsku úrvalsdeildinni og í fleiri deildum Evrópu er að finna hér.
- Auglýsing -
