- Auglýsing -
- Sigvaldi Björn Guðjónsson skoraði níu mörk þegar lið hans, Kolstad, vann Runar, 41:32, í norsku úrvalsdeildinni í karlaflokki á heimavelli í gær. Kolstad er efst í deildinni með 33 stig eftir 18 leiki, er þremur stigum á undan Elverum sem er í öðru sæti.
- Storhamar vann Fana, 33:24, í norsku úrvalsdeildinni í kvennaflokki í gær og heldur áfram að fylgja Vipers eins og skugginn. Aðeins munar tveimur stigum á liðunum en stöðuna í deildinni er að finna hér. Axel Stefánsson er annar þjálfari Storhamar
- Fredericia vann nauman sigur á TMS Ringsted á útivelli í dönsku úrvalsdeildinni í handknattleik karla í gær, 24:23, og situr þar með áfram í öðru sæti deildarinnar þremur stigum á eftir Aalborg Håndbold en sex stigum á undan Bjerringbro/Silkeborg sem er í þriðja sæti. Einar Þorsteinn Ólafsson er leikmaður Fredericia og Guðmundur Þórður Guðmundsson þjálfar liðið af röggsemi eins og fyrri daginn.
- Lærisveinar Halldórs Jóhanns Sigfússonar í Nordsjælland töpuðu á útivelli fyrir SønderjyskE, 32:24, í dönsku úrvalsdeildinni í gær. Nordsjælland er í 12. sæti af 14 liðum með 12 stig. Kolding og Lemvig eru fyrir neðan, einu stigi á eftir.
- Stöðuna í dönsku úrvalsdeildinni og í fleiri deildum evrópsks handknattleiks er að finna hér.
- Áfram eru Andrea Jacobsen og samherjar í Silkeborg-Voel á sigurbraut. Þær unnu Skanderborg Håndbold, 33:28, á heimavelli í gær. Andrea skoraði ekki mark að þessu sinni. Silkeborg-Voel er í 5. sæti me 22 stig eftir 19 leiki, fjórum stigum á eftir Nykøbing-Falster.
- Tryggvi Þórisson og samherjar unnu stórsigur á Amo, 37:23, í sænsku úrvalsdeildinni í gærkvöld og sitja áfram á toppi deildarinnar með 31 stig eftir 18 leiki. Skövde er í öðru sæti með 26 stig. Tryggvi skoraði ekki mark í leiknum. Honum var einu sinni vikið af leikvelli í tvær mínútur. Arnar Birkir Hálfdánsson skoraði tvö mörk og var einu sinni vikið af leikvelli. Arnar Birkir leikur með Amo sem er í 10. sæti með 14 stig.
- Ólafur Andrés Guðmundsson skoraði fimm mörk fyrir HF Karlskrona þegar liðið gerði jafntefli við IF Hallby HK, 30:30, í sænsku úrvalsdeildinni í gær. Leikurinn fór fram á heimavelli Hallby. Dagur Sverrir Kristjánsson og Þorgils Jón Svölu Baldursson skoruðu ekki HF Karlskrona að þessu sinni. Phil Döhler varði fimm skot, 38,5%, þann tíma sem hann stóð á milli stanganna í marki HF Karlskrona. Liðið er í 11. sæti með 14 stig eins og Amo sem áður er getið.
- Stöðuna í sænsku úrvalsdeildinni í handknattleik og í fleiri deildum í evrópskum handknattleik er að finna hér.
- Haukur Þrastarson skoraði eitt mark þegar Industria Kielce vann Piotrkowianin Piotrków Trybunalski, 41:27, á heimavelli í 19. umferð pólsku úrvalsdeildarinnar í gær. Industria Kielce er í öðru sæti deildarinnar, þremur stigum á eftir Wisla Plock.
- Bjarki Finnbogason skoraði tvisvar sinnum fyrir Anderstorps SK þegar liðið vann LIF Lindesberg, 33:28, á útivelli í Allsvenskan, næstu efstu deild sænska handknattleiksins í gærkvöld. Eftir tvo sigurleiki í röð er Anderstorps SK komið upp í 9. sæti af 14 liðum deildarinnar þegar 20 af 26 umferðum er lokið.
- Óðinn Þór Ríkharðsson var ekki í leikmannahópi Kadetten Schaffhausen í gærkvöld þegar liðið vann Wacker Thun, 28:22, á heimavelli í 21. umferð A-deildarinnar í Sviss. Kadetten Schaffhausen er langefst með 37 stig, sex stigum á undan HC Kriens sem er í öðru sæti.
- Auglýsing -
