- Auglýsing -
- Sigvaldi Björn Guðjónsson, fyrirliði norska meistaraliðsins Kolstad, skoraði fimm mörk þegar liðið vann Drammen, 32:26, í fyrstu umferð undanúrslita úrslitakeppni norsku úrvalsdeildarinnar í gær. Leikur fór fram í Kolstad Arena í Þrándheimi.
- Róbert Sigurðarson lét til sín í taka í vörninni hjá Drammen. Var honum vikið af leikvelli í tvígang. Viktor Petersen Norberg skoraði eitt mark fyrir Drammen.
- Unglingalandsliðsmarkvörðurinn Ísak Steinsson var í leikmannahópi Drammen. Hann fékk tækifæri undir lok leiksins. Ísak, sem verið hefur annar markvarða U18 og U19 ára landsliða Íslands undanfarin ár, hefur gert það gott með IL ROS sem er samstarfsfélag og ungmennalið Drammen.
- Næsta viðureign Drammen og Kolstad fer fram í Drammenhallen á mánudaginn. Elverum og Arendal eigast við í hinni viðureign undanúrslitanna. Liðin leiða saman kappa sína í fyrsta sinn á heimavelli Elverum á morgun. Dagur Gautason verður að vanda með Arendal-liðinu.
- Axel Stefánsson og liðsmenn hans í Storhamar unnu nauman sigur á Oppsal, 29:28, í fyrstu umferð átta liða úrslita norsku úrvalsdeildarinnar í handknattleik kvenna í gær. Leikurinn fór fram í Hamar. Önnur viðureign liðanna fer fram í Ósló á sunnudaginn.
- Fredrikstad Bkl., liðið sem Elías Már Halldórsson þjálfar, tapaði fyrir Sola, 30:24, í Stafangri í gær í fyrsta leik liðanna í átta liða úrslitum norsku úrvalsdeildarinnar í kvennaflokki. Vinna þarf tvo leiki í átta liða úrslitum. Næsti leikur verður í Fredrikstad á laugardaginn.
- Larvik og Vipers Kristiansand unnu einnig viðureignir sínar í fyrstu umferð átta liða úrslita.
- Andrea Jacobsen skoraði eitt mark fyrir Silkeborg-Voel þegar liðið tapaði fyrir meisturum síðasta árs, Esbjerg, 43:27, á heimavelli í úrslitakeppni dönsku úrvalsdeildarinnar í handknattleik í gær. Esbjerg er lang besta lið deildarinnar um þessar mundir og hefur ekki tapað leik í vetur. Silkeborg-Voel á veika von um sæti í undanúrslitum um meistaratitilinn. Átta liða úrslitin eru leikin í tveimur fjögurra liða riðlum.
- Harpa Rut Jónsdóttir skoraði ekki mark fyrir GC Zürich þegar liðið vann fyrrverandi lið Hörpu, LK Zug, 29:24, í lokaumferð efri hluta keppni svissnesku úrvalsdeildarinnar á heimavelli í gær. GC Zürich krækti þar með í þriðja sætið, á eftir Brühl og SPONO Eagles.
- Auglýsing -
