- Auglýsing -
- Sigvaldi Björn Guðjónsson var markahæstur leikmanna Kolstad þegar liðið tryggði sér sæti í úrslitum úrslitakeppni norsku úrvalsdeilarinnar með öruggum sigri á Drammen í annarri viðureign liðanna í Drammenhallen í gær, 28:23. Sigvaldi Björn skoraði sjö mörk og geigaði ekki á skoti.
- Róbert Sigurðarson lék að vanda með Drammen og lét mest að sér kveða í vörninni. Viktor Petersen Norberg skoraði fjögur mörk. Ísak Steinsson unglingalandsliðsmarkvörður varði fjögur skot þann tíma sem hann stóð í marki Drammen, 44%.
- Í kvöld skýrist hvort Elverum eða ØIF Arendal með Dag Gautason innanborðs mætir Kolstad í úrslitum. Liðin mætast í Sør Amfi, heimavelli ØIF Arendal, öðru sinni. Elverum vann fyrri viðureignina á heimavelli með eins marks mun, 36:35.
- Svissneski landsliðsmarkvörðurinn Nikola Portner má vænta þess að niðurstaða úr svokölluðu B-sýni lyfjaprófs sem hann gekkst undir fyrir nokkrum vikum liggi fyrir í vikunni. Frá því var greint fyrir um hálfum mánuði að Portner, sem er leikmaður þýska liðsins Magdeburg, hafi fallið á lyfjaprófi en merki um neyslu metamfetamíns fannst í A-prófinu sem alltaf er rannsakað fyrst. Í hvert sinn sem íþróttamenn skila af sér þvagsýni í lyfjaprófi er því skipt í tvo hluta, A- og B-sýni. Ef ekkert óeðlilegt finnst í rannsókn A-sýnisins er B-sýnið ekki rannsakað.
- Franska landsliðskonan Alicia Toublanc kveður Brest Bretagne í heimalandi sínu í sumar og gengur til liðs við Valcea í Rúmeníu. Samningur hennar við félagið er til tveggja ára.
- Danski handknattleiksmarkvörðurinn Ronnie Nicolaisen er tilneyddur til þess að legga skóna á hilluna, 30 ára gamall. Nicolaisen hefur ekki jafnað sig af heilahristingi í kjölfar þess að hann fékk boltann í höfuðið. Nicolaisen hefur reynt að snúa til baka út á völlinn en án árangurs. Hann lék síðast með Ribe-Esbjerg.
- Auglýsing -
