- Auglýsing -
- Sigvaldi Björn Guðjónsson var markahæstur hjá norska meistaraliðinu Kolstad með átta mörk ásamt Simen Ulstad Lyse þegar liðið vann Bergen Håndball, 32:25, í öðrum leik Kolstad í norsku úrvalsdeildinni í handknattleik í gær. Leikurinn fór fram í Björgvin. Sigvaldi Björn skoraði tvö marka sinni úr vítaköstum. Norska stórstjarnan Sander Sagosen var ekki í leikmannahópi Kolstad í leiknum.
- David Mandic skoraði sigurmark MT Melsungen þegar liðið vann lærisveina Rúnars Sigtryggssonar í SC DHfK Leipzig, 28:27, í annarri umferð þýsku 1. deildarinnar í handknattleik í gær. Sigurmarkið var skorað nærri tveimur mínútum fyrir leiksloka. Mikill darraðardans var á lokakaflanum þegar leikmenn SC DHfK Leipzig freistuðu þess að jafna metin.
- Viggó Kristjánsson skoraði sjö mörk og átti tvær stoðsendingar fyrir SC DHfK Leipzig auk þess sem honum var einu sinni vikið af leikvelli. Andri Már Rúnarsson skoraði ekki mark fyrir Leipzig-liðið.
- Arnar Freyr Arnarsson og Elvar Örn Jónsson skoruðu eitt mark hvort fyrir MT Melsungen sem hefur unnið tvo fyrstu leiki sína í deildinni. SC DHfK Leipzig hefur á hinn bóginn tapað tveimur fyrstu leikjunum með samanlagt þriggja marka mun
- Fredrikstad Bkl., liðið sem Elías Már Halldórsson þjálfar, gerði tapaði í heimsókn til Molde í annarri umferð norsku úrvalsdeildarinnar í gær, 27:26. Sigurmarkið var skorað úr vítakasti eftir að leiktíminn var úti. Fredrikstad Bkl. hefur fengið tvö stig úr tveimur fyrstu leikjum sínum.
- Ásgeir Snær Vignisson skoraði ekki mark fyrir Fjellhammer þegar liðið vann Kristiansand, 30:27, á heimavelli í fyrsta leik sínum í norsku úrvalsdeildinni í gær.
- Orri Freyr Þorkelsson skoraði ekki mark fyrir Sporting þegar liðið tapaði fyrir Barcelona í undanúrslitum í Íberíubikarnum í handknattleik karla í gær, 37:32. Sporting leikur í dag við Logroño La Rioja um þriðja sætið í keppninni. Barcelona og Porto leika til úrslita.
- Alpla Hard, liðið sem Hannes Jón Jónsson þjálfar, vann HSG Graz með eins marks mun, 24:23, á útivelli í gær í fyrstu umferð austurrísku 1. deildarinnar í handknattleik í gær
- Viktor Gísli Hallgrímsson og samherjar í Nantes steinlágu fyrir PSG í Meistarakeppninni í franska handknattleiknum í gær, 35:25.
- Auglýsing -
