- Auglýsing -
- Vlado Šola hefur skrifað undir nýjan samning um þjálfun karlalandsliðsins Svartfjallalands fram yfir heimsmeistaramótið sem fram fer í janúar á næsta ári í Danmörku, Króatíu og Noregi. Šola, sem er Króati og fyrrverandi markvörður, tók við þjálfun svartfellska landsliðsins í febrúar á síðasta ári.
- Mikil ánægja ríkir meðal Svartfellinga með árangur landsliðsins á EM í janúar en það hafnaði í 14. sæti. Ekki síst kætti sigurinn á Serbum í lokaumferð riðlakeppninnar Svartfellinga. Framundan eru umspilsleikir um sæti á HM á næsta ári. Svartfellingar mæta annað hvort Belgum eða Ítölum í umspilinu.
- Þorsteinn Gauti Hjálmarsson, leikmaður Fram, er í landsliðshópi Finna í handknattleik karla sem Ole Lindgren landsliðsþjálfari hefur valið til leikja við Litháen í forkeppni heimsmeistaramótsins. Leikirnir fara fram upp úr miðjum mars. Sigurliðið mætir Ungverjum í umspili um HM-sæti í maí.
- Sænska landsliðskonan Anna Lagerquist hefur dregið sig út úr sænska landsliðinu sem mætir Íslandi í undankeppni Evrópumóts kvenna um næstu mánaðarmót. Lagerquist sleit krossband í hné í leik með liðinu sínu, Nantes í Frakklandi, í síðustu viku. Lagerquist getur einnig afskrifað þátttöku á Ólympíuleikunum í sumar ef sænska landsliðið verður með en það tekur þátt í forkeppni í apríl.
- Branko Tamše þjálfari króatíska liðsins RK Nexe var óvænt sagt upp störfum á laugardagskvöld í kjölfar tap liðsins fyrir Sesvete, 38:33. Tap dró mjög úr vonum RK Nexe um að keppa við RK Zagreb um meistaratitilinn í karlaflokki. Zagreb hefur titilinn í ríflega 30 ár röð. Uppsögn Tamše kom á óvart því undir hans stjórn hefur liðið náð athyglisverðum árangri og verið það næst besta í Króatíu. M.a. komst RK Nexe í undanúrslit Evrópudeildarinnar vorið 2022 og er t.d. ennþá með í Evrópudeildinni sem komin er í 16-liða úrslit.
- Norski markvörðurinn Marie Davidsen hefur samið við Molde í heimalandi sínu. Hún hefur leikið utan heimalandsins árum saman. Davidsen stendur vaktina í marki CSM Búkarest til loka leiktíðarinnar. Hún gekk til liðs við CSM fyrir þremur árum eftir nokkurra ára dvöl hjá þýska liðinu Thüringer. Davidsen hefur fimmtán sinnum klæðst norsku landsliðstreyjunni.
- Auglýsing -
