- Auglýsing -
- Þýska liðið SC Magdeburg og pólsku meistararnir Kielce mætast í úrslitaleik Meistaradeildar Evrópu í handknattleik karla í Lanxess Arena í Köln klukkan 16 í dag. Danski handknattleiksáhugamaðurinn Rasmus Boysen bendir á þá staðreynd að a.m.k. einn Króati hafi tekið þátt í úrslitaleik Meistaradeildar frá árinu 2012. Að þessu sinni verður um að ræða Igor Karacic leikmann Kielce.
- Spænskir og slóvenskir landsliðsmenn hafa einnig átt sæti í öllum liðum sem leikið hafa til úrslita í Meistaradeildinni frá árinu 2014.
- Daninn Emil Madsen er markahæstur í Meistaradeild Evrópu á leiktíðinni. Hann skoraði 107 mörk fyrir GOG. Madsen og GOG eru úr leik. Næstur á eftir Madsen er Pólverjinn Kamil Syprzak, leikmaður PSG. Syprzak þarf að skora 11 mörk í viðureign PSG og Barcelona um þriðja sætið til þess að jafna metin við Danann. Arkadiusz Moryto, leikmaður Kielce, er þriðji á lista með 95 mörk. Moryto verður í eldlínunni með liði sínu í úrslitaleiknum.
- Madsen er eftirsóttur af félögum utan Danmerkur. M.a. hafnaði GOG tilboði í hann frá THW Kiel á dögunum.
- Sigur SC Magdeburg á Barcelona í undanúrslitaleik Meistaradeildar Evrópu í karlaflokki í gær var sá þriðji í röð hjá Magdeburg á spænska stórliðinu í alþjóðlegri keppni. Magdeburg lagði Barcelona í úrslitum heimsmeistaramóts félagsliða haustið 2021 og aftur á síðasta ári.
- Magdeburg vann Meistaradeild Evrópu síðast árið 2002 undir stjórn Alfreðs Gíslasonar. Kielce vann keppnina fyrir sjö árum. Þá eins og nú var Talant Dujshebaev þjálfari liðsins. Bæði lið unnu ungverska liðið Veszprém í úrslitum keppninnar.
- Undanúrslitaleikur Meistaradeildar Evrópu í handknattleik karla hefst klukkan 13.15 í dag og verður á milli franska meistaraliðsins PSG og Spánarmeisturum Barcelona.
- Flautað verður til úrslitaleiksins á milli SC Magdeburg og Kielce klukkan 16. Hægt verður að fylgjast með báðum leikjum í beinni útsendingu án endurgjalds á EHFtv.com.
- Auglýsing -
