- Auglýsing -
- Sveinn Jóhannsson skoraði tvö mörk og átti tvær stoðsendingar einnig í þriggja marka sigri GWD Minden á Bayer Dormagen, 32:29, í 2. deild þýska handknattleiksins í gær. Leikurinn var í næst síðustu umferð deildarinnar. Minden-liðinu hefur vegnað afar vel síðustu vikur og er fyrir löngu sloppið úr allri fallhættu þrátt fyrir að vera aðeins tveimur sætum fyrir ofan fallsæti.
- Þetta var síðasti heimaleikur Sveins með GWD Minden en hann gengur til liðs við norska meistaraliðið Kolstad í sumar. Minden leikur á útivelli gegn Nordhorn í lokaumferð 2. deildar eftir viku, 1. júní.
- IK Sävehof vann þriðju úrslitaviðureignina við Ystads IF HF um sænska meistaratitilinn í handknattleik karla í gær, 39:37. Tvívegis varð að framlengja leikinn til þess að ná fram sigri á annan hvorn veginn. IK Sävehof hefur þar með tvo vinninga en Ystads IF HF einn en vinna þarf þrjá leiki til þess að verða meistari. Næsti leikur verður í Ystad á þriðjudaginn.
- Tryggvi Þórisson var ekki á meðal þeirra sem skoraði fyrir IK Sävehof í sigurleiknum í gær.
- Alpla Hard, liðið sem Hannes Jón Jónsson þjálfar, vann Krems, 30:26, í oddaleik í undanúrslitum austurrísku 1. deildarinnar í handknattleik í gær. Alpla Hard leikur til úrslita um austurríska meistaratitilinn við Linz. Fyrsti úrslitaleikurinn verður í Bregenz á þriðjudaginn.
- Grétar Ari Guðjónsson og samherjar hans í Sélestat unnu Cherbourg, 32:29, í síðari umspilsleik liðanna í undanúrslitum umspils frönsku 1. deildarinnar í handknattleik á heimavelli í gærkvöld. Sélestat vann einnig fyrri viðureignina á útivelli fyrr í vikunni.
- Grétar Ari lék annan hálfleik leiksins í marki Sélestat og varði tvö skot.
- Sélestat mætir Istres í úrslitum umspilsins 1. júní. Sigurliðið tekur sæti í efstu deild franska handknattleiksins á næstu leiktíð. Í hinni viðureign umspilsins mætast Tremblay og Frontignan.
- Auglýsing -
