- Auglýsing -
- Teitur Örn Einarsson skoraði fjögur mörk þegar Flensburg vann Stuttgart á heimavelli, 39:31, í þýsku 1. deildinni í handknattleik í gærkvöld. Selfyssingurinn átti einnig tvær stoðsendingar.
- Lukas Jørgensen og Simon Pytlick skoruðu sjö mörk hvor fyrir Flensburg sem heldur fast í þriðja sæti þýsku 1. deildarinnar. Liðið hefur 46 stig eftir 30 leiki, fjórum stigum á eftir Magdeburg og Füchse Berlin.
- Marino Maric og Kai Häfner skoruðu sex mörk hvor fyrir Stuttgart en liðið er í hópi þeirra neðstu eftir talsvert vonbrigðatímabil.
- Heiðmar Felixson aðstoðarþjálfari Hannover-Burgdorf fagnaði mjög þegar lið hans vann Rhein-Neckar Löwen, 29:27, í útivelli í þýsku 1. deildinni í handknattleik í gær. Ýmir Örn Gíslason lék að vanda með Rhein-Neckar Löwen. Hannover-Burgdorf situr í sjötta sæti með 36 stig að loknum 31 leik, er stigi fyrir ofan Gummersbach sem á tvo leiki til góða. Gummersbach mætir Füchse Berlin í dag í Berlín.
- Hákon Daði Styrmisson og samherjar í Eintracht Hagen hafa misst dampinn í síðustu leikjum í þýsku 2. deildarinnar. Ein staðfesting þess er níu marka tap á útivelli fyrir TuS N-Lübbecke, 35:26, í gær. Var þetta þriðja tap Hagen röð.
- Hákon Daði skoraði tvö mörk en varð að fara af leikvelli meiddur á þegar 18 mínútur voru til leiksloka. Hagen situr í fjórða sæti með 38 stig eins og TuS N-Lübbecke.
- EHV Aue tapaði í hörkuleik á heimavelli fyrir Dessau-Roßlauer HV 06, 29:27, í 2. deild þýska handknattleiksins í gær. EHV Aue er fallið í 3. deild. Sveinbjörn Pétursson varði þrjú skot á þeim nærri stundarfjórðungi sem hann stóð í marki EHV Aue en liðið rekur lestina með 10 stig þegar þrjár umferðir eru eftir.
- Bjarki Már Elísson skoraði tvö mörk fyrir Telekom Veszprém þegar liðið vann Carbonex–Komló, 43:28, í 25. og næst síðustu umferð ungversku 1. deildarinnar í gær. Bjarki Már og félagar hafa fyrir löngu tryggt sér deildarmeistaratitilinn. Fljótlega eftir landsleikjahléið tekur við úrslitakeppnin um meistaratitilinn.
- Auglýsing -
