- Auglýsing -
- Thea Imani Sturludóttir meiddist á ökkla á æfingu Valsliðsins á fimmtudagskvöld og fór ekki með Val til Vestmannaeyja í gær í fyrsta leikinn gegn ÍBV í úrslitum um Íslandsmeistaratitilinn. Óvíst er hvort hún verður með í öðrum leik Vals og ÍBV í Origohöllinni á mánudaginn. Thea Imani hefur verið ein af betri leikmönnum Olísdeildarinnar á tímabilinu og ljóst að það mun muna mikið um hana.
- Birna Berg Haraldsdóttir er ennþá fjarverarndi í Eyjaliðinu vegna handarbrots sem hún hlaut fyrir nokkru. Birna Berg er í liðsstjórn og hvetur samherja sína til dáða sem hún best má.
- Liðsmenn IFK Kristianstad mæta Tryggva Þórissyni og samherjum í Sävehof í rimmu um sænska meistaratitilinn í handknattleik karla. Þetta varð ljóst í gær eftir að Kristianstad vann Hammarby, 31:30, í fjórðu viðureign liðanna sem fram fór í Stokkhólmi. Í fyrrakvöld vann Sävehof þriðja leikinn gegn meisturum síðasta árs, Ystads, eins og handbolti.is sagði frá í gær. Fyrsti úrslitaleikur Sävehof og IFK Kristianstad verður í Partille eftir viku.
- Sävehof leikur einnig til úrslita um sænska meistaratitilinn í úrvalsdeild kvenna. Andstæðingurinn verður H65 Höör sem vann Íslendingaliðið Skara HF í átta liða úrslitum.
- Í dag fara fram undanúrslit í Evrópudeild kvenna í handknattleik. Annars vegar mætast danska liðið Ikast Handbold og Thüringer HC frá Þýskalandi og hinsvegar eigast við Borussia Dortmund frá Þýskalandi og Nykøbing Falster frá Danmörku. Úrslitaleikirnir verða á morgun. Úrslitahelgin fer fram í Graz í Austurríki. Emma Olsson sem lék með Fram veturinn 2021/2022 og varð Íslands- og deildarmeistari fyrir ári leikur með Dortmund.
- Auglýsing -
