- Auglýsing -
- Monique Tijsterman hefur verið ráðin landsliðsþjálfari Austurríkis í handknattleik kvenna. Hún tekur við af Herbert Müller sem lét af störfum eftir heimsmeistaramótið í desember að loknum 20 árum í stóli landsliðsþjálfara. Tijsterman er hollensk og hefur lengi þjálfað í heimalandi sínu m.a. A-landslið kvenna frá 2021 til 2022 auk þess að vera fyrrverandi leikmaður.
- Franski línumaðurinn Cedric Sorhaindo hefur verið leystur undan samningi hjá Dinamo Búkarest. Sorhaindo hikaði ekki eitt andartak því hann samdi í kjölfarið við Besiktas í Tyrklandi.
- Cedric Sorhaindo verður fertugur í sumar. Hann var lengi aðallínumaður franska landsliðsins og lék þar að auki í 11 ár með Barcelona eða allt þar til hann fylgdi þjálfaranum Xavi Pascual til rúmensku meistaranna fyrir hálfu þriðja ári.
- Sænski landsliðsmaðurinn Oskar Sunnefeldt verður samherji Ýmis Arnar Gíslasonar hjá Göppingen frá og með næstu leiktíð. Sunnefeldt leikur nú undir stjórn Rúnars Sigtryggssonar hjá Leipzig og hefur eins og Ýmir Örn ákveðið að færa sig um set. Ýmir samdi við Göppingen skömmu fyrir áramót og flytur frá Mannheim í sumar.
- Danski handknattleiksmaðurinn Jonathan Würtz hefur greinst með krabbamein og leikur þar með ekki fleiri leiki með úrvalsdeildarliðinu Skjern á keppnistímabilinu. Würtz er 24 ára gamall og hefur leikið yfir 100 leiki fyrir Skjern. Í nóvember samdi hann við Ribe-Esbjerg frá og með næsta tímabili. Í tilkynningu frá Skjern í gær segir að bjartsýni ríki að læknismeðferð sem Würtz stendur frammi fyrir muni bera árangur en næstu mánuðir fara í að vinna bug á sjúkdómnum.
- Þýski markvörðurinn Silvio Heinevetter gengur í sumar til liðs Eisenach þegar núverandi samningur hans við Stuttgart rennur út. Heinevetter er með reyndari markvörðum í þýska handboltnum og hefur m.a. leikið 206 landsleiki.
- Auglýsing -
