- Auglýsing -
- Við upphafshátíð úrslitahelgar Meistaradeildar Evrópu í gær var greint frá því að borgaryfirvöld í Köln og Handknattleikssamband Evrópu, EHF, hafi skrifað undir nýja fimm ára samning um að úrslitahelgi Meistaradeildar Evrópu verði áfram í Lanxess-Arena. Samningurinn nær fram til ársins 2029 en þá verða 20 ár liðin síðan úrslitahelgin var sett á laggirnar í og keppnisfyrirkomulagi undanúrslita og úrslita breytt þannig að leikirnir fjórir fara fram á einni helgi. Frá upphafi hefur Lanxess-Arena hýst viðburðin.
- Fyrir viku var tilkynnt að EHF og borgaryfirvöld í Búdapest hafi framlengt veru úrslitahelgar Meistaradeildar kvenna í MVM Dome í borginni til og með árinu 2027.
- Danski línumaðurinn hjá meistaraliðinu SC Magdeburg, Magnus Saugstrup, var valinn leikmaður ársins í þýsku 1. deildinni í handknattleik en greint var frá niðurstöðunum í gær. Þetta er í þriðja sinn í röð sem leikmaður SC Magdeburg verður fyrir valinu en Gísli Þorgeir Kristjánsson hreppti hnossið fyrir ári og Ómar Ingi Magnússon fyrir tveimur árum.
- Annar leikmaður SC Magdeburg, Felix Claar, varð í öðru sæti að þessu sinni og Daninn Mathias Gidsel hjá Füchse Berlin hafnaði í þriðja sæti.
- Danski landsliðsmaðurinn Michael Damgaard leikur ekki með SC Magdeburg í leikjum úrslitahelgar Meistaradeildar Evrópu í handknattleik í Köln. Damgaard meiddist á öxl í viðureign SC Magdeburg og Wetzlar í síðustu umferð þýsku 1. deildarinnar á sunnudaginn. Í gær var staðfest að meiðslin væru það alvarleg að Damgaard verður ekki með. SC Magdeburg mætir Aalborg Håndbold í undanúrslitaleik Meistaradeildar í Lanxess Arena klukkan 13 í dag.
- Steffen Weinhold sem lengi lék með þýska landsliðinu leikur sína síðustu leiki fyrir THW Kiel um helgina en hann hyggst leggja skóna á hilluna 37 ára gamall. Weinhold hefur leikið leikið með Kiel frá 2014. Kiel mætir Barcelona í undanúrslitum Meistaradeildar í Lanxess–Arena klukkan 16 í dag. Sigurliðið leikur til úrslita á morgun tapliðið á þess kost að vinna bronsverðlaun.
- Spánverjinn Raul Alonso og HC Erlangen hafa komist að samkomulagi að Alonso láti af störfum íþróttastjóra hjá félaginu frá og með gærdeginum. Alonso var áður þjálfari liðsins um tveggja ára skeið og hafði Ólaf Stefánsson sér við hlið. Alonso færðist yfir í starf íþróttastjóra fyrir ári og Ólafur hvarf á braut.
- Auglýsing -
