Hannes Jón Jónsson, þjálfari Alpla Hard í Austurríki. Mynd/Alexandra Köß
- Auglýsing -
Tumi Steinn Rúnarsson skoraði tvö mörk og gaf fjórar stoðsendingar í sex marka sigri liðs hans, Alpla Hard, á Füchse, 41:35, á heimavelli í austurrísku 1. deildinni í handknattleik í gær. Hannes Jón Jónsson er þjálfari Alpla Hard.
Með sigrinum tryggði Alpla Hard sér deildarmeistaratitilinn annað árið í röð. Liðið á tvo leiki eftir og hefur sex stiga forskot á BT Füchse sem er í öðru sæti. Krems er í þriðja sæti sjö stigum á eftir Alpla Hard en á þrjá leiki óleikna.
Að deildarkeppninni lokinni í Austurríki tekur við átta liða úrslitakeppni með sama sniði og á Íslandi.
Bergischer HC, sem Þórsarinn Arnór Þór Gunnarsson þjálfar í samstarfi við Markus Pütz vann toppslaginn í þýsku 2. deildinni í gærkvöld þegar leikmenn GWD Minden voru sóttir heim. Lokatölur, 32:27.
Arnór Viðarsson skoraði eitt mark fyrir Bergischer HC en Tjörvi Týr Gíslason skoraði ekki mark. Noah Beyer og Yannick Fraatz voru markahæstir með átta mörk hvor.
Bergischer HC er í efsta sæti deildarinnar með 34 stig eftir 22 leiki. Tólf leiki á liðið eftir fyrir lok keppnistímabilsins. GWD Minden er fimm stigum á eftir Bergischer en á leik til góða. Hüttenberg og Balingen-Weilstetten eru skammt á eftir.
