- Auglýsing -
- Klukkan 19 í kvöld fer fram síðasti leikur UMSK-móts kvenna. HK og Grótta mætast í Kórnum. Sigurliðið hafnar í þriðja sæti mótsins, næst á eftir Aftureldingu og Stjörnunni.
- Þýski handknattleiksmaðurinn Christian Dissinger er án félags um þessar mundir eftir að hafa lokið samningi sínum hjá félagsliði í Katar. Hann æfir nú með danska liðinu KIF Kolding sem hugsanlega semur við kappann á næstu dögum. Dissinger, sem var í þýska landsliðinu sem varð Evrópumeistari fyrir sjö árum undir stjórn Dags Sigurðssonar, er aðeins 31 ár. Hann hefur engu að síður víða farið, var lengi hjá THW Kiel, einnig um árabil hjá Vardar Skopje og Dinamo Búkarest.
- Ein fremsta og reyndasta handknattleikskona heims um þessar mundir, Cristina Neagu, var sektuð um 4.000 evrur, jafnvirði um 600 þúsund króna, af Handknattleikssambandi Evrópu, EHF, fyrir að gagnrýna dómara eftir að lið hennar, CSM Búkarest, féll úr keppni í átta liða úrslitum Meistaradeildar Evrópu fyrir Esbjerg.
- Neagu sagði m.a. í viðtali við fjölmiðla að dómararnir hafi rænt rúmenska liðinu sigri í síðari leiknum. Útilokað hafi verið að vinna leikinn verandi sjö á móti níu liðsmönnum andstæðinganna. Helmingur sektarinnar verður felldur niður eftir ár haldi Neagu sig á mottunni að mati EHF.
- Sænski handknattleiksmaðurinn Maximilian Jonsson hefur samið við franska liðið Chambéry til eins árs. Það væri í sjálfu sér ekki í frásögur færandi nema vegna þess að Jonsson hefur þar með leikið með 16 liðum í 11 löndum á ferlinum. Óhætt er að segja að hinn 33 ára gamli Svíi sé víðförull.
- Raivis Gorbunovs fyrrverandi leikmaður Harðar á Ísafirði skoraði fjögur mörk fyrir Bergsøy í fjögurra marka tapi liðsins á heimavelli fyrir Charlottenlund, 26:22, í næst efstu deild norska handboltans. Gorbunovs gekk til liðs við Bergsøy í september 2021 og lék undir stjórn Lárusar Gunnarssonar fyrsta tímabilið áður en Lárus flutti heim á nýjan leik og hvarf frá þjálfun.
- Auglýsing -
