- Auglýsing -
- Victor Máni Matthíasson sem lék með StÍF í færeysku úrvalsdeildinni í handknattleik á síðustu leiktíð hefur æft með Stjörnunni upp á síðkastið og tók m.a. þátt í viðureign liðsins við Gróttu í UMSK-mótinu á laugardaginn. Victor Máni lék síðast hér heima með Fjölni keppnistímabilið 2021/2022.
- Tryggvi Þórisson og samherjar í IK Sävehof unnu Lugi í hörkuleik í 1. umferð riðlakeppni sænsku bikarkeppninnar í gær, 33:32. Tryggvi var ekki á meðal þeirra sem skoraði í leiknum. Bikarkeppnin fer að vanda fram í mörgum riðlum á fyrsta stigi keppninnar. Tvö efstu lið hvers riðils komast áfram á næsta stig keppninnar þegar útsláttur hefst.
- Viktor Gísli Hallgrímsson og samherjar í Nantes töpuðu fyrir ungverska liðinu Pick Szeged í úrslitaleik fjögurra liða móts í handknattleik karla í gær, 34:32.
- Lærisveinar Guðmundar Þórðar Guðmundssonar í Fredericia HK töpuðu í gær, 31:26, fyrir Evrópumeisturum SC Magdeburg í síðasta æfingaleik þýska liðsins fyrir átökin í þýsku 1. deildinni sem hefjast undir lok vikunnar. Magdeburg var sex mörkum yfir í hálfleik 14:8. Janus Daði Smárason var ekki á meðal þeirra sem skoraði fyrir Magdeburg. Einar Þorsteinn Ólafsson lék ekki með Fredericia HK. Hann er meiddur á öxl.
- Orri Freyr Þorkelsson og nýir samherjar hans í Sporting Lissabon unnu alla leiki sína á æfingamóti sem lauk í gær. Sá síðasti var gegn spænska liðinu BM Torrelavega í gær og lauk með sjö marka mun, 30:23. Litlar upplýsingar var að finna um markaskora en víst er þó að Hafnfirðingurinn varð ekki markahæstur í leiknum.
- Danska handknattleikssambandið skiptir um heiti og fær nýtt merki frá og með deginu í dag. Í stað þess að nefnast Dansk Håndbold Forbund hefur verið tekið upp heitið DanskHåndbold. Danska handknattleikssambandið var stofnað 1935.
- Þýska meistaraliðið THW Kiel verður án örvhenta leikmannsins Eduardo Gurbindo um tíma eftir að hann meiddist á föstudaginn. Það væri í sjálfu sér ekki í frásögur færandi nema vegna þess að Spánverjinn kom til félagsins á dögunum til að hlaupa í skarðið fyrir Steffen Weinhold sem verður lengi frá keppni. Þess utan er ungstirnið, Henri Pabst sem einnig er örvhentur, líka úr leik vegna meiðsla sem hann varð fyrir í æfingaleik við U19 ára landslið Íslands í sumar.
- Pólska meistaraliði Kielce vann þriggja liða mót sem fram fór á Spáni og lauk á laugardaginn. Liðið vann FDM Cangas og Atlético Valladolid örugglega á mótinu. Haukur Þrastarson lék ekki með Kielce á mótinu. Hann er að ná bata eftr krossbandaslit í byrjun desember á síðasta ári.
- Auglýsing -
