- Auglýsing -
- Rhein-Neckar Löwen situr í áttunda sæti þýsku 1. deildarinnar í handknattleik karla eftir eins marks tap fyrir Stuttgart í Porsche-Arena í Stuttgart í gærkvöld, 32:31. Ýmir Örn Gíslason skoraði eitt mark fyrir Rhein-Neckar Löwen í leiknum. Arnór Snær Óskarsson skoraði ekki mark að þessu sinni.
- Sascha Pfattheicher skoraði sigurmark Stuttgart, 32:31, fimm sekúndum fyrir leikslok en Gustav Davidsson hafði jafnað metin, 31:31, 20 sekúndum áður. Stuttgart er með 13 stig eins og Erlangen, Bergischer og Eisenach en liðin eru í sætum fjórtán til sautján. Balingen er áfram langneðst með sjö stig. Aðeins er fjögurra stiga munur á liðinu sem er í níunda sæti og því sem situr í 17. og næst neðsta sæti.
- Bergischer HC hefur ekki vegnað sem best upp á síðkastið og er komið í hóp neðstu liða eftir að hafa verið nærri miðri deild fyrir fáeinum vikum. Bergischer tapaði á heimavelli í gærkvöld, 28:23. Arnór Þór Gunnarsson er aðstoðarþjálfari liðsins. Stöðuna í þýsku 1. deildinni og í fleiri deildum evrópsks handknattleiks er að finna hér.
- Hlé hefur verið gert á keppni í þýsku 1. deildinni til 7. febrúar. Leikið verður í átta liða úrslitum bikarkeppninnar 3. og 4. febrúar áður en deildarkeppnin hefst aftur.
- Í morgun var franski handknattleiksmaðurinn Kentin Mahé sagður ganga til liðs við Bergischer HC í sumar þegar hann yfirgefur Telekom Veszprém. Mahé, sem er 32 ára gamall miðjumaður, er öllum hnútum kunnugur í þýska handboltanum eftir að hafa leikið þar um árabil m.a. með Flensburg, HSV Hamburg og Gummersbach.
- Einn þekktasti handknattleiksmarkvörður sögunnar, Þjóðverjinn Wieland Schmidt, hélt upp á 70 ára afmæli sitt í gær. Schmidt var m.a. í sigurliði Austur-Þýskalands á Ólympíuleikunum 1980 og lék nær allan sinn feril með Magdeburg (1974 – 1989) og varð margfaldur meistari. Hann flutti sig yfir til VfL Hameln og síðar GWD Minden eftir að múrinn féll og opnað var á milli þýsku ríkjanna.
- Auglýsing -
