Það var sannkölluð sigurstund í Zagreb Arena í gærkvöld þegar íslenska landsliðið lagði Slóvena, 23:18, í þriðju og síðustu umferð G-riðils heimsmeistaramótsins í handknattleik karla og tryggði sér fjögurra stiga nesti í milliriðlakeppnina sem hefst á miðvikudag með leik við Egypta. Egyptar eru einnig taplausir á mótinu.
Áfram fjölgar Íslendingum í hópi stuðningsmanna í Zagreb og fleiri eru væntanlegir á næstu dögum. Sérsveitin, stuðningsmannasveit landsliðanna, heldur að vanda utan um stemninguna utan vallar sem innan og slær ekki af enda ekki ástæða til. Spenna, eftirvænting og síðan sigurbros skein úr hverju andliti Íslendinga í Zagreb Arena í gærkvöld.
Hafliði Breiðfjörð ljósmyndari var að vanda á vaktinni í Zagreb Arena og fangaði stemninguna.
