Stiven Tobar Valencia lék sinn fyrsta landsleik á heimavelli í gær þegar íslenska landsliðið lék við Tékka og vann með níu marka mun, 28:19, í undankeppni EM. Leikurinn fór fram fyrir framan á þriðja þúsund áhorfendur í endurbættri Laugardalshöll.
Stiven Tobar fékk frábærar viðtökur þegar hann var kynntur til leiks og hreif síðan áhorfendur með sér þegar hann fékk tækifæri til þess að leika með í vörn jafnt sem sókn allan síðari hálfleikinn. Ljóst er að áhorfendur hafa tekið ástfóstri við nýjasta liðsmann strákanna okkar, eins og landsliðið er oft nefnt þegar vel gengur.
Stiven skoraði sitt fyrsta landsliðsmark og fagnaði því innilega eins og myndirnar hér að neðan bera með sér. Forseti Íslands, Hr. Guðni Th. Jóhannesson, hitti Stiven í leikslok og óskaði honum til hamingju með frammistöðuna. Einnig eltu ungir aðdáendur Stiven um alla Laugardalshöll eftir leikinn til þess að fá myndir af sér með honum og eiginhandaráritun á treyjur og miða.
Myndasyrpa: Elís greip í taumana þegar vörin á Viggó sprakk
Myndasyrpa: „Boltinn kom rétt hjá auganu“
Hafliði Breiðfjörð ljósmyndari hafði vakandi augu á Stiven í leiknum í gær og myndaði m.a. fögnuð Stivens þegar hann hafði skorað sitt fyrsta landsliðsmark. Smellið á myndirnar í syrpunni til þess að sjá þær stærri.
