„Þetta var hörkusigur gegn frábæru liði. Við lögðum allt í sölurnar. Þetta var bara geðveikt,“ sagði Þórður Tandri Ágústsson markahæsti leikmaður Stjörnunnar við handbolta.is eftir sigur á Aftureldingu 27:25, í öðrum leik liðanna í átta liða úrslitum Olísdeildar karla í handknattleik í Heklu-höllinni í Garðabæ í dag.
Vegna sigurs Stjörnunnar verður oddaleikur á milli liðanna að Varmá á þriðjudaginn. Sigurlið þess leiks kemst í undanúrslit en tapliðið situr eftir með sárt ennið.
„Við ætlum okkur bara áfram. Maður bíður eftir úrslitakeppninni allan veturinn þá er eins gott að gera sitt allra besta þegar þangað er komið. Vonandi fylgja þá sigrarnir með,“ segir Þórður Tandri ennfremur.
Lengra viðtal er við Akureyringinn í myndskeiðinu hér fyrir ofan. Beðist er velvirðingar á hversu hátt umsjónarmanni handbolta.is liggur rómur í viðtalinu við Þórð Tandra.
Sjá einnig:
Myndskeið: Síðasta sókn Aftureldingar í Mýrinni
Oddaleikur að Varmá á þriðjudagskvöld eftir háspennu í Mýrinni
Olís karla: Leikjadagskrá, úrslitakeppni
