„Ég er hrikalega ánægður með sigurinn og strákana og nálgun þeirra á leikinn,“ sagði Magnús Stefánsson þjálfari ÍBV í samtali við handbolta.is á Ásvöllum í kvöld eftir að ÍBV tryggði sér sæti í undanúrslitum Olísdeildar karla með öðrum sigri á Haukum í átta liða úrslitum, 37:31.
Magnús sagði að eftir leikina tvo við Hauka væri hann hvað ánægðastur með varnarleikinn og hversu skynsamir menn hafi verið í sóknarleiknum.
„Við töpuðum boltanum sjaldan illa. Fyrir vikið náðum við að stilla upp í vörn sem skiptir gríðarlegu máli.“
Eyjamenn þrífast á háu spennustigi í leikjum og að stemningin sé mikil enda hefur ÍBV á mörgum undanförnum árum náð langt í úrslitakeppninni, það er þeirra keppni hvernig sem allt verkast í deildarkeppninni á undan. „Þannig fúnkerum við best,“ sagði Magnús.
„Hvernig er ekki hægt að elska þetta? Þegar menn hafa verið í handbolta alla ævi þá er úrslitakeppnin og allt sem henni fylgir það sem menn þrífast á,“ sagði Magnús ennfremur.
Í samtalinu í myndskeiðinu hér fyrir ofan fór Magnús vítt og breitt. M.a. ræddi hann um frábæra stuðningsmenn sem komu í fjölmennum flokkum frá Vestmannaeyjum til Ásvalla í dag. Einnig sagði Magnús skoðun sína á dómgæslunni í leiknum í dag en ekki voru allir á eitt sáttir með hana frekar en fyrri daginn.
Sjá einnig:
Olís karla: Leikjadagskrá, úrslitakeppni
Eyjamenn komu í veg fyrir Hafnarfjarðarslag í undanúrslitum
