Tveir leikmenn fengu ríflega 90% af atkvæðum í kosningu lesenda á besta leikmanni íslenska landsliðsins í leiknum við Suður Kóreu í kvöld. Óðinn Þór Ríkharðsson, markahæsti leikmaður Íslands í kvöld með 11 mörk, fékk slétt 50% atkvæða þeirra sem tóku þátt. Næstur var Viktor Gísli Hallgrímsson markvörður, sem einnig fór hamförum í leiknum. Hann hreppti 40,5% atkvæða.
Segja má með sanni að aðrir hafi fengið minna. Viggó Kristjánsson varð þriðji með 2,7% atkvæða.
Eins og eftir fyrri leiki íslenska landsliðsins í keppninni þá leitaði handbolti.is til lesenda í vali á manni leiksins í íslenska liðinu.
Björgvin Páll Gústavsson varð hlutskarpastur eftir viðureignina við Portúgal. Bjarki Már Elísson hreppti hnossið á laugardaginn í leiknum við Ungverja.
Áfram heldur handbolti.is að leita til lesenda um að velja mann leiksins. Næst verður brugðið á leik á miðvikudaginn þegar íslenska landsliðið leikur fyrsta sinni í milliriðlakeppninni í Gautaborg.
Handbolti.is þakkar lesendum fyrir þátttökuna.
