Patrekur Jóhannesson þjálfari Stjörnunnar fékk rauða spjaldið eftir að viðureign KA og Stjörnunnar í Olísdeild karla lauk í KA-heimilinu í gærkvöld. Um leið og hann tók í höndina á dómurunum að leik loknum virðist Patrekur hafa misst eitthvað út úr sér sem dómurunum mislíkaði.
Gunnar Óli Gústafsson, annar dómarinn, dró a.m.k. hiklaust upp rauða spjaldið og hóf það á loft fyrir framan Patrek eins og sjá má á myndum Skapta Hallgrímssonar ritstjóra Akureyri.net. Segja má að Patrekur hafi bókstaflega séð rautt þegar hann hitti dómarana á gamla heimavelli sínum en Patrekur lék með KA um skeið á tíunda áratugnum.
Vildu fá dæmt brot
Stjörnumenn, sem töpuðu leiknum með einu marki, 27:26, voru ósáttir við að ekki væri dæmt brot á varnarmann KA þegar Egill Magnússon komst í opið færi 10 sekúndum fyrir leikslok. Í fljótu bragði virtist Egill hafa verið hindraður. Skot hans var varið af Nicolai Horntvedt Kristensen markverði KA sem kom þar með í veg fyrir að Stjarnan jafnaði metin.
Hvort sem Patrekur lýsti yfir óánægju sinni vegna þessa atviks þegar honum var sýnt rauða spjaldið eða vegna annars skal ósagt látið.
Skýrsla til aganefndar
Að öllum líkindum skila Gunnar Óli Gústafsson og Bjarki Bóasson dómarar inn skýrslu til aganefndar vegna spjaldsins. Hvort spjaldið dregur dilk á eftir sér fyrir Patrek kemur þá væntanlega í ljós þegar aganefndin sér hvað í skýrslu dómaranna stendur. Aganefnd HSÍ kemur saman á þriðjudaginn.
Rólegt var hjá aganefndinni í vikunni sem er að renna sitt skeið. Alltént hefur fundargerð aganefndar ekki verið birt á vef HSÍ.
