„Það var sami taktur í þessu hjá okkur og gegn Stjörnunni um daginn. Ég átta mig ekki alveg á því hvað var að angra menn og af hverju leikurinn fór svona hjá okkur,“ sagði Þórir Ólafsson þjálfari karlaliðs Selfoss við handbolta.is á Varmá í gærkvöld eftir sjö marka tap Selfoss fyrir Aftureldingu, 38:31, í 10. umferð Olísdeildar karla. Þetta var þriðja tap Selfossliðsins í röð.
Í jafnri stöðu, 13:13, liðlega fjórum mínútum fyrir lok fyrri hálfleiks misstu leikmenn Selfoss tök á leik á tveggja mínútna kafla. Afturelding skoraði fjögur mörk í röð og var með fjögurra marka forskot í hálfleik. Í síðari hálfleik náðu Selfyssingar aldrei upp dampi og voru um tíma 10 mörkum undir.
Engin markavarsla og slök vörn
„Markvarslan var lítil sem engin hjá okkur í kvöld. Varnarleikurinn var heldur ekki viðunandi og því miður héldust þessi tvö atriði í hendur frá upphafi til enda. Sóknarleikurinn gekk heldur ekki sem skildi, færanýting okkar í fyrri hálfleik var ekki góð. Hún skánaði í seinni en þá hélt vörn og markvarsla ekki svo það var erfitt að vinna upp forskotið sem Afturelding hafði náð,“ sagði Þórir.
Verðum að herða upp hugann
Þriðja tap Selfossliðsins í röð eftir góða byrjun í deildarkeppninni sagði Þórir út af fyrir sig ekki vera áhyggjumál. Andstæðingarnir hafi verið góðir.
„Því miður höfum við ekki náð að gíra okkur í 60 mínútur í undanfarna leiki. Skásti leikurinn af þessum þremur var gegn Val en því miður hafa töpin fyrir Stjörnunni og Aftureldingu verið of stór. Við getum ekkert annað gert en hert upp hugann og mætt klárir í næsta leik,“ sagði Þórir Ólafsson þjálfari karlaliðs Selfoss í samtali við handbolta.is á Varmá í gærkvöld.
Selfossliðið sækir Gróttu heim í Hertzhöllina á Seltjarnarnesi á sunnudaginn.
