Sigurjón Friðbjörn Björnsson var í kvöld ráðinn þjálfari meistaraflokks kvenna hjá Gróttu. Hann tekur við af Gunnari Gunnarssyni sem sagði starfinu lausu á dögunum. Ráðning Sigurjóns Friðbjörns kemur heim og saman við frétt handbolta.is á laugardaginn.
Sigurjón er 34 ára gamall og er menntaður íþróttafræðingur frá HR. Hann kemur til Gróttu frá HK þar sem hann var aðstoðarþjálfari kvennaliðsins. Sigurjón Friðbjörn hefur komið víða við og var aðstoðarþjálfari Stjörnunnar í Olísdeildinni tímabilin 2020-2022. Einnig hefur hann þjálfað meistaraflokka Fjölnis og ÍR. Hann er annar þjálfara U17 ára landsliðs kvenna. Sigurjón Friðbjörn var einnig leikmaður í efstu deild um árabil hjá HK og ÍR.
„Við erum mjög ánægð með að fá Sigurjón Friðbjörn til okkar í Gróttu. Hann er gríðarlega fær þjálfari sem við erum heppin að fá til okkar,” segir Arnkell Bergmann Arnkelsson formaður Handknattleiksdeildar Gróttu í tilkynningu handknattleikdeildar félagsins í kvöld.
Fyrsti leikur Gróttu undir stjórn Sigurjóns Friðbjörns verður gegn HK U á sunnudaginn í Hertzhöllinni á Seltjarnarnesi. Fimm dögum síðar sækir Grótta efsta lið Grill 66-deildarinnar, Aftureldingu, heim.
Staðan og næstu leikir í Grill 66-deild kvenna.
