Skarphéðinn Ívar klæðist rauðu á næsta tímabili

Handknattleiksmaðurinn ungi frá Akureyri, Skarphéðinn Ívar Einarsson, hefur ákveðið að segja skilið við KA í sumar og ganga til liðs við Hauka. Skarphéðinn Ívar hefur skrifað undir þriggja ára samning við Hafnafjarðarliðið og tekur samningurinn gildi í sumar.

Skarphéðinn Ívar er efnileg vinstri skytta sem hefur þrátt fyrir ungan aldur spilað í Olísdeildinni undanfarin þrjú ár með KA. Í vetur hefur hann skorað 70 mörk í 20 leikjum með KA í Olísdeildinni. Einnig lét Skarphéðinn að sér kveða með U-liði KA í Grill 66-deildinni þar sem hann skoraði 92 mörk í 9 leikjum.

Skarphéðinn Ívar var einn leikmanna 3. flokks KA sem vann Poweradebikarinn fyrr í þessum mánuði.

Til viðbótar hefur Skarphéðinn Ívar átt sæti í yngri landsliðunum undanfarin sumur.