Steinunn Björnsdóttir fyrirliði Fram og landsliðskona í handknattleik er barnshafandi og mun þar af leiðandi er óvissa hversu mikið hún leikur með Fram á næsta keppnistímabili. Jafnframt er ljóst að Steinunn leikur ekki með landsliðinu í undankeppni EM í haust né ef landsliðið fær boð og þiggur um þátttöku á heimsmeistaramótinu sem fram fer í lok nóvember og í byrjun desember.
Steinunn sagði frá gleðifregnunum í lífi sínu og fjölskyldunnar á Instagram í gær og fékk handbolti.is leyfi hjá Steinunni til að segja einnig frá.
Fyrir eiga Steinunn og sambýlismaður hennar, Vilhjálmur Theodór Jónsson, fimm ára dóttur. Hálfum mánuði eftir fæðingu dótturinnar í árslok 2017 var Steinunn mætt á æfingu með Fram og var í leikmannahópi liðsins fjórum vikum eftir fæðingu.
Steinunn skrifaði nýverið undir nýjan samning við Fram sem gildir til loka leiktíðarinnar 2025 svo ljóst er að hún stefnir á að mæta aftur út völlinn.
