„Það var vitað að við værum með sterkara lið en Eistlendingar en það er oft ekki nóg því sýna þarf fram á það og strákarnir gerðu það með því að mæta rétt innstilltir og vinna vel fyrir þessum örugga sigri þar sem allir fengu að taka þátt sem er dýrmætt til framtíðar litið. Við náðum efsta sæti riðilsins, markmiðið okkar náðist,“ sagði Ágúst Þór Jóhannsson annar þjálfara íslenska landsliðsins í handknattleik karla við handbolta.is í gær eftir öruggan íslenskan sigur á Eistlendingum í síðustu umferð undankeppni Evrópumótsins í handknattleik karla í Laugardalshöll í gær, 30:23.
Allir fengu sitt tækifæri
„Við hreyfðum mikið við liðinu síðustu fimmtán til tuttugu mínúturnar og misstum aðeins dampinn, nokkrar sóknir voru ekki nógu agaðar. Við hefðum ekki slegið hendinni á móti því að vinna með 10 til 15 mörkum. Það skiptir ekki öllu máli þegar öllu er á botninn hvolft heldur að við unnum og náðum efsta sætinu sem tryggir okkur góða stöðu þegar dregið verður í riðla fyrir EM í næsta mánuði,“ sagði Ágúst Þór sem var afar ánægður með fyrri hálfleikinn. Íslenska liðið byrjaði af krafti og gaf landsliði Eistlendinga aldrei færi á sér.
„Leikur okkar í fyrri hálfleik var virkilega góður. Vörnin frábær, mörg hraðaupphlaupin mjög vel útfærð. Einnig var Viktor Gísli frábær í markinu. Okkur tókst að halda Eistlendingum í 23 mörkum sem er mjög gott,“ sagði Ágúst Þór sem væntanlega var að stýra landsliðinu í síðasta sinn í samstarfi við Gunnar Magnússon.
„Við Gunnar kveðjum sáttir,“ sagði Ágúst Þór Jóhannsson í samtali við handbolta.is í Laugardalshöll í gær.
Myndasyrpa: Ísland – Eistland 30:23 – EM sæti í höfn
