- Auglýsing -
- Auglýsing -
- Auglýsing -

Straumrof og hálftíma seinkun

Frá viðureign Íslands og Ungverjalands í dag eftir að rafmagnið komst aftur á í keppnishöllinni. Mynd/IHF
- Auglýsing -

Aðeins voru liðnar rétt liðlega tvær mínútur af viðureign Íslands og Ungverjalands á heimsmeistaramóti 20 ára landsliða kvenna í handknattleik þegar straumrof varð í Jane Sandanski íþróttahöllinni við bakka Vardar í Skopje í Norður Makedíóníu. Var þetta í annað sinn á nokkrum dögum sem rafmagn slær út í kappleik í keppnishöllinni meðan á kappleik stendur.

Steypiregn og þrumuveður

Aðeins neyðarlýsing logaði í keppnissalnum og auk auglýsingaskiltis. Illa gekk að koma rafmagninu á að nýju og liðu nærri 25 mínútur áður en björninn var unninn í þeim efnum. Fengu leikmenn þá fimm mínútur til þess að hita upp áður en flautað var til leiks á ný.

Ástæða útsláttarins mun vera sú að rétt um það bil sem leikurinn hófst gerði steypiregn með þrumum og eldingum. Það nægði til þess að skammhlaup varð og rafmagnið rofnaði.

Enn verra á sunnudaginn

Enn verra var þegar rafmagnið fór af sömu keppnishöll á sunnudaginn þegar Danir og Suður Kóreubúar áttust við þegar þrumuveður gekk yfir. Þá tók langan tíma að koma rafmagni á keppnishöllina. Endaði með því að leikmenn, þjálfarar og starfsmenn voru fluttir í aðra keppnishöll til þess að leiða viðureignina til lykta. Liðu þá 75 mínútur frá því að fyrri hálfleik lauk og þar til sá síðari hófst en straumrofið varð þegar hálfleikur stóð yfir.

Rafmagn sló út í þrumuveðri í Skopje – hálf leikin viðureign flutt á milli húsa

Sambyggð glæsilegu hóteli

Jane Sandanski Arena er hin glæsilegasta keppnishöll. Hún var opnuð á nýjan leik eftir viðamiklar endurbætur, þar á meðal stækkun, fyrir áratug. Jane Sandanski Arena er heimavöllur Vardar Skopje sem lengi var á meðal fremstu handknattleiksliða Evrópu, ekki síst í karlaflokki. Lið félagsins vann Meistaradeild karla 2017 og 2019. Glæsihótelið Hótel Russia er sambyggt keppnishöllinni enda fjármagnaði sami maður, Sergey Samsonenko, endurbætur keppnishallarinnar, hélt uppi Vardar árum saman og byggði hótelið.

Handbolti.is veit ekki hvort rafmagnið fór af glæsihótelinu í dag þegar keppnishöllin varð myrkvuð.

- Auglýsing -
- Auglýsing -
- Auglýsing -
- Auglýsing -
- Auglýsing -
- Auglýsing -