Handknattleiksmaðurinn Sveinn Andri Sveinsson leikur með Selfossi á komandi leiktíð sem hefst í vikulokin. Frá þessu segir í tilkynningu frá handknattleiksdeild Selfoss í morgunsárið. Samningur Selfoss við Svein Andra er til eins árs.
Sveinn Andri lék með Empor Rostock í næst efstu deild þýska handknattleiksins en meiddist snemma í apríl þegar flísaðist upp úr ristinni. Eftir það lék Sveinn Andri ekkert með liðinu og flutti heim til Íslands á nýjan leik.
ÍR-ingur að upplagi
Sveinn Andri er 24 ára gamall leikstjórnandi sem vakti ungur athygli með ÍR auk þess að leika með yngri landsliðunum. Hann gekk til liðs við Aftureldingu í framhaldi af uppstokkun á ÍR-liðinu þegar það féll úr Olísdeildinni um vorið. Með Aftureldingu lék Sveinn Andri í tvö ár uns hann ákvað að söðla um sumarið 2022 freista gæfunnar með Empor Rostock í Þýskalandi.
Vill hjálpa sem fyrst
„Endurhæfingin tók sinn tíma en ég vonast til þess að komast alveg inn í allt á Selfossi sem fyrst til að hjálpa liðinu eins og ég get,“ sagði Sveinn Andri í skilaboðum til handbolta.is.
Sveinn Andri æfði um skeið með ÍR í sumar en var einnig orðaður við Hauka og KA auk Selfoss sem hann hefur nú samið við.
Karlar – helstu félagaskipti 2023
„Sveinn er útispilari og getur leyst flestar stöður. Hann mun koma til með að styrkja hóp meistaraflokks karla í Olísdeildinni í vetur. Handknattleiksdeild Selfoss er gríðarlega ánægð með að Sveinn Andri taki slaginn með Selfoss og verður spennandi að fylgjast með liðinu í vetur,“ segir m.a. í tilkynningu handknattleiksdeildar Selfoss.
Selfoss leikur við KA í 1. umferð Olísdeildar karla í Sethöllinni á Selfossi á laugardaginn. Flautað verður til leiks klukkan 16.
Tengdar fréttir:
Atli Ævar hættur – Guðjón Baldur sleit krossband
Handkastið: Króati er undir smásjá á Selfossi