„Flott frammistaða hjá stelpunum í dag. Ég mjög stoltur af þeim og þeirri baráttu og vinnusemi sem þær lögðu í leikinn,“ sagði Ágúst Þór Jóhannsson þjálfari Vals við handbolta.is eftir sigur á Club Balonmano Elche, 21:18, í síðari leik liðanna í 3. umferð Evrópubikarkeppninnar í handknattleik kvenna á Spáni í dag. Því miður dugði sigurinn Valsliðinu ekki til þess að komast áfram eftir fimm marka tap í gær.
„Það var grátlega svekkjandi að komast ekki áfram. Við vorum hársbreidd frá að koma leiknum í vítakeppni, fengum dauðafæri þegar átta sekúndur voru eftir og við fjórum mörkum yfir. Þess utan þá fórum við með 13 dauðafæri í síðari hálfleik sem er rosalega dýrt gegn jafn góðu liði og Elche,“ sagði Ágúst Þór en eins og kom fram í frásögn handbolta.is frá viðureigninni varði Nicole Alejandra Morales Claure markvörður Elche allt hvað af tók í síðari hálfleik.
Valur náði mest sjö marka forskoti snemma í síðari háfleik en fimmtán mínútur án marks í síðari hálfleik reyndist dýrt þegar upp var staðið.
„Varnarleikurinn var mun betri í dag en í gær og sömu sögu er að segja um markvörsluna. Það sem fór með leikinn var slæm nýting úr dauðafærum sem varð til þess að markvörður Elche var besti maður liðsins,“ sagði Ágúst Þór Jóhannsson þjálfari Vals eftir leikinn á Alicante í dag.
