„Varnarlega finnst mér við bregðast þegar við hleyptum þeim inn í leikinn í fyrri hálfleik. Við lentum í erfiðleikum með að loka á Þorstein og treystum conceptinu okkar ekki nægilega vel. Þar af leiðandi hleyptum við þeim inn í leikinn sem var alls ekki gott,“ sagði Sigursteinn Arndal þjálfari FH skiljanlega vonsvikinn eftir þriggja marka tap fyrir Aftureldingu í fyrsta úrslitaleiknum um Íslandsmeistaratitilinn í handknattleik karla í Kaplakrika í kvöld, 32:29.
Eftir frábæra byrjun FH-inga, en þeir voru sex mörkum yfir, 13:7, eftir 17 mínútur þá rann forskotið úr höndum þeim á nokkrum mínútum. Með það var Sigursteinn óánægður eins og hann getur um að ofan.
„Við fengum einnig tækifæri til þess að koma okkur inn í leikinn á lokakaflanum en nýttum ekki færin. Við því er ekki hægt að gera héðan af. Eina sem við getum gert til að bæta fyrir tapið í kvöld er að mæta þeim mun sterkari til leiks í Mosfellsbæ á miðvikudagskvöldið,“ sagði Sigursteinn ákveðinn og ljóst að hann var strax farinn að leiða hugann að næsta leik og beið þess að geta skoðað upptöku af viðureigninni í kvöld.
„Því miður þá var þetta svolítið stöngin út hjá okkur í kvöld,“ sagði Sigursteinn Arndal þjálfari FH.
Önnur viðureign Aftureldingar og FH verður að Varmá á miðvikudagskvöld. Flautað verður til leiks klukkan 19.40. Hátt í 2.000 áhorfendur voru á leiknum í Kaplakrika í kvöld. Búast má við svipuðum fjölda á miðvikudaginn að Varmá.
