Staðfest hefur verið að leikstjórnandinn Tumi Steinn Rúnarsson gengur til liðs við austurríska handknattleiksliðið Alpla Hard og leikur þar með undir stjórn Hannesar Jóns Jónssonar. Austurríska liðið sagði frá komu Tuma Steins í morgun en félagaskipti hans hafa legið í loftinu í nokkrar vikur.
Tumi Steinn, sem er 24 ára gamall, gekk til liðs við þýska 2. deildarliðið HSC 2000 Coburg í janúar 2022 frá Val og lýkur vitanlega leiktíðinni með liðinu sem situr í fimmta sæti um þessar mundir. Auk þess að hafa leikið með Val var Tumi Steinn í tvö ár með Aftureldingu.
Alpla Hard hefur um árabil verið með eitt besta handknattleikslið Austurríkis í karlaflokki. Um þessa mundir situr það í öðru sæti efstu deildar þegar þrjár umferðir eru eftir. Síðan tekur við úrslitakeppni.
Fullur eftirvæntingar
Haft er eftir Tuma Steini á heimasíðu félagsins að hann sé fullur eftirvæntingar yfir að ganga til liðs við Alpla Hard og komast í kynni við þá sigurhefð sem ríki innan félagsins. Eins hlakkar hann til að æfa og leika undir stjórn Hannesar Jóns, kynnast nýjum liðsfélögum og taka þátt í því góða andrúmslofti sem ríki í kringum stuðningsmenn félagsins.
Hannes Jón Jónsson tók við þjálfun Alpla Hard sumarið 2021. Alpla Hard hefur sjö sinnum orðið austurrískur meistari og fjórum sinnum bikarmeistari. Liðið er með bækistöðvar í Bregenz, nærri Bodensevatni.
