„Þetta eru tvö góð stig sem tryggja okkur þann stað í deildinni sem við viljum vera á,“ sagði Sigrún Ása Ásgrímsdóttir leikmaður ÍR í samtali við handbolta.is í kvöld eftir fimm marka sigur ÍR-inga á KA/Þór, 22:17, í 17. umferð Olísdeildar kvenna í handknattleik í Skógarseli í kvöld.
Markmiðið er innan seilingar
„Við erum á góðri leið að ná markmiði okkar sem er að vera með öruggt sæti í úrslitakeppninni þegar hún hefst í vor. Sigurinn færir okkur einu skrefi nær. Við stefnum hærra og viljum nýta það tækifæri ef það gefst,“ sagði Sigrún Ása en ÍR er nú jafnt ÍBV að stigum í fjórða til fimmta sæti. ÍBV á reyndar tvo leiki á ÍR-inga vegna frestaðra viðureigna.
Kom sem betur fer ekki að sök
Það gekk á ýmsu hjá ÍR-ingum í leiknum í kvöld. Liðið skoraði ekki nema tvö mörk síðustu 20 mínúturnar og mátti þakka fyrir að leikmönnum KA/Þórs voru einnig mislagðar hendur í sóknarleiknum svo að illa gekk að vinna niður forskot ÍR-inga.
„Þegar staðan okkar var orðin góð í síðari hálfleik þá misstum við aðeins taktinn. Við fórum kannski út úr leikjaplaninu. Hættum að leika okkar leik en sem betur fer kom það ekki að sök að þessu sinni,“ sagði Sigrún Ása ennfremur en ÍR-ingar hafa svo sannarlega verið spútniklið Olísdeildarinnar í vetur eftir að hafa komist bakdyramegin upp í deildina síðasta vor að loknum sigri á Selfoss í hreint mögnuðum fimm umpsilsleikjum.
Staðan og næstu leikir í Olísdeildum.
