Úlfur Gunnar Kjartansson leikmaður Hauka var í dag úrskurðaður í þriggja leikja keppnisbann af aganefnd HSÍ. Hann hlaut útilokun fyrir harkalegt brot í viðureign Hauka og Fram í Olísdeild karla í síðustu viku.
Eins og handbolti.is sagði frá í gær taldi aganefnd brotið hugsanlega verðskulda meira en eins leiks bann. Þar af leiðandi ákvað nefndin að bíða með úrskurð sinn í sólarhring og gefa Haukum tækifæri til þess að senda inn greinargerð.
Aganefnd kom aftur saman til fundar upp úr hádeginu í dag. Kemur fram í úrskurði nefndarinnar á vef HSÍ að Haukar hafi ekki gripið til varna í málinu, þ.e. ekki sent frá sér greinargerði.
„Með tilvísun í 10. gr. reglugerðar HSÍ um agamál er það niðurstaða aganefndar að leikmaðurinn er úrskurðaður í þriggja leikja bann,“ segir orðrétt í úrskurðinum.
Næsti leikur 8. febrúar
Úlfur Gunnar verður ekki gjaldgengur með Haukum fyrr en 8. febrúar gegn Víkingi. Hann tekur út leikbann gegn HK á morgun, á móti Stjörnunni í næstu viku og þegar Haukar mæta ÍBV 3. febrúar.
Þetta er annað tímabilið í röð sem Úlfur Gunnar er úrskurðaður í þriggja leikja bann í Olísdeild karla.