Borgakeppni Norðurlandanna, einnig nefnt Grunnskólamót höfuðborga Norðurlandanna, hefst hér á landi á sunnudaginn og stendur fram til föstudagsins 31. maí. Úrvalslið Reykjavíkur í handknattleik stúlkna, fæddar 2010, tekur þátt í mótinu en einnig reyna unglingarnir með sér í knattspyrnu drengja og frjálsíþróttum tveggja kynja. Mótið hefur verið haldið árlega frá árinu 1948, að einu ári undanskildu.
Sigríður Unnur Jónsdóttir hefur haft veg og vanda að undirbúningi handknattleiksliðs stúlkna. Tuttugu stúlkur voru valdar til æfinga sem tóku yfir þrjár helgar. Eftir æfingatarnirnar valdi Sigríður Unnur 10 stúlkur til þess að keppa á leikunum. Undirbúningur hefur haldið áfram síðustu daga með þátttöku í æfingaleikjum.
Leikirnir fara fram í Laugardalshöll. Fyrsti leikurinn verður við úrvalslið Óslóar á mánudaginn klukkan 11. Daginn eftir stendur fyrir dyrum leikur við kapplið Kaupmannahafnar kl. 11.45. Klukkan 11.15 á miðvikudaginn kemur að leik við úrvalslið frá Helsinki.
Hópurinn sem Sigríður Unnur valdi er skipaður eftirtöldum stúlkum:
Anja Gyða Vilhelmsen, Víkingi.
Brynja Sif Gísladóttir, Fram.
Katrín Ásta Jóhannsdóttir, ÍR.
Kolbrún Ída Kristjánsdóttir, Fjölni/Fylki.
Ragna Lára Ragnarsdóttir, Fjölni/Fylki.
Sara Sigurvinsdóttir, Val.
Sara Sveinsdóttir, Val.
Sigurveig Ýr Halldórsdóttir, Fram.
Sylvía Sigrún Eðvarðsdóttir, Gróttu.
Ylfa Hjaltadóttir, Fram.
Reykjavíkurliðinu hefur vegnað afar vel á leikunum síðustu árin. Árgangur 2008 kom heim með silfurverðlaun fyrir tveimur árum frá Ósló. Á síðasta ári hreppti árgangur 2009 gullið þegar borgakeppnin var haldin í Helsinki.
