Valur er áfram efstur og ósigraður í Olísdeild karla í handknattleik eftir sigur á Fram á heimavelli í kvöld, 34:30. Úrslitin réðust á síðustu 10 mínútum leiksins þegar Valsarar voru greinilega sterkari þegar aðeins dró af Framliðinu. Staðan í hálfleik var 19:16, Val í vil eftir nokkrar sveiflur.
Fram byrjaði betur og var tveimur mörkum yfir snemma, 5:3. Valsliðið skoraði 10 mörk á næstu tíu mínútum á meðan leikmenn Fram skoruðu fjórum sinnum áður en þeir vöknuðu á nýjan leik.
Valsmenn voru lengi í gang í síðari hálfleik. Það nýtti Framliðið sér til þess að skora sex fyrstu mörkin, 19:22. Það fór á kostum í sókninni auk þess sem Arnór Máni Daðason fór mikinn í markinu. Hann lokaði markinu og meira og minna í fyrri hluta síðari hálfleiks.
Valsmenn létu ekki hug falla og eftir leikhlé tók ekki langan tíma að jafna metin, 22:22, m.a með tveimur mörkum frá Björgvin Páli Gústavssyni markverði. Eftir það skiptust liðin á um að vera með eins marks forskot þar til halla tók nærri leikslokum. Þá virtist sem meira þrek byggi í Valsmönnum. Magnús Óli Magnússon fór á kostum í sókninni og Björgvin Páll varði vel, m.a. vítakast frá Rúnari Kárasyni.
Staðan og næstu leikir í Olísdeildum.
Mörk Vals: Magnús Óli Magnússon 9/2, Úlfar Páll Monsi Þórðarson 4, Benedikt Gunnar Óskarsson 4/1, Viktor Sigurðsson 4, Tjörvi Týr Gíslason 3, Ísak Gústafsson 3, Alexander Petersson 3, Andri Finnsson 2, Björgvin Páll Gústavsson 2.
Varin skot: Björgvin Páll Gústavsson 19/1, 38,8%.
Mörk Fram: Rúnar Kárason 8/3, Marko Coric 7, Reynir Þór Stefánsson 6, Theodór Sigurðsson 3, Daníel Stefán Reynisson 1, Tryggvi Garðar Jónsson 1, Stefán Orri Arnalds 1, Magnús Öder Einarsson 1, Kjartan Þór Júlíusson 1, Þorsteinn Gauti Hjálmarsson 1.
Varin skot: Lárus Helgi Ólafsson 9/2, 32,1% – Arnór Máni Daðason 7, 35%.
