Valur er kominn í átta liða úrslit Evrópubikarkeppninnar í handknattleik karla eftir að hafa unnið Metaloplastika Sabac öðru sinni í kvöld, að þessu sinni í Sabac í Serbíu, 30:28. Valur vann fyrri viðureignina á heimavelli á síðasta sunnudag, 27:26. Metaloplastika var fjórum mörkum yfir í hálfleik í kvöld, 16:12. Valsmenn léku frábærlega í síðari hálfleik, náðu stjórn á hraða leiksins og keyra upp hraðann og snúa leiknum sér í hag.
Eftir að hafa átt undir högg að sækja í síðari hluta fyrri hálfleiks og framan af þeim síðari þá unnu leikmenn Vals sig inn í leikinn jafnt og þétt. Þeir jöfnuðu metin, 21:21, 11 mínútum fyrir leikslok. Róbert Aron Hostert jafnaði metin aftur, 24:24, sjö mínútum fyrir leikslok. Eftir það skoraði Valur þrjú mörk í röð, 27:24, þegar fjórar mínútur voru eftir.
Mikil spenna var á síðustu mínútunum. Metaloplastika var vel stutt af fjölmörgum áhorfendum. Leikmenn Vals létu það ekki slá sig út af laginu. 75 sekúndum fyrir leikslok var forskot Vals ennþá þrjú mörk, 29:26. Leikmenn Metaloplastika reyndu hvað þeir gátu en höfðu ekki erindi sem erfiði. Ísak Gústafsson innsiglaði sigur Vals skömmu fyrir leikslok, 30:28.
Valur byrjaði leikinn betur og var yfir, 9:6, eftir stundarfjórðung. Þá kom slæmur kafli þar sem sóknarleikurinn gekk illa og varnarleikurinn einnig. Heimamenn skoruðu 10 mörk gegn þremur Vals á síðasta stundarfjórðungi fyrri hálfleik. Um tíma var forskot Metaloplastika sex mörk, 16:10. Það var þó alls ekki til að leikmenn Vals legðu árar í bát, þvert á móti. Þeir lögðust á árar og svo sauð á keipum í síðari hálfleik.
Mörk Vals: Úlfar Páll Monsi Þórðarson 10, Benedikt Gunnar Óskarsson 7, Ísak Gústafsson 4, Róbert Aron Hostert 2, Tjörvi Týr Gíslason 2, Agnar Smári Jónsson 1, Aron Dagur Pálsson 1, Allan Norðberg 1, Alexander Pettersson 1, Andri Finnsson 1.
Hægt var að fylgjast með leiknum í streymi á handbolti.is. Mjög margir nýttu sér það. Takk fyrir.
