„Þetta var bara eins og svart og hvítt hjá okkur. Ég er mjög ánægður með fyrri hálfleikinn en síðan tókst Valsliðinu að loka á nærri allt sem við gerðum í síðari hálfleik,“ sagði Sigurður Bragason þjálfari ÍBV við handbolta.is eftir níu marka tap, 33:24, fyrir Val í Olísdeild kvenna í handknattleik í kvöld. ÍBV var marki yfir í hálfleik, 16:15, en tapaði síðari hálfleik með 10 marka mun.
Anna Úrsúla át okkur
„Birna náði ekki skotunum sínum og Anna Úrsúla át okkur með blokkum í vörninni. Upp úr því fór ég að reyna sjö á sex í sókninni. Ég fann að leikurinn var að fara frá okkur svo ég tók séns. Hann gekk upp til að byrja með en síðan fengum við á okkur fjögur mörk í röð í autt markið og þá má segja að leikurinn hafi verið búinn,“ sagði Sigurður sem tók tvö leikhlé með þriggja mínútna millibili frá 40 til 44 mínútu.
„Þegar við vorum komin mörgum mörkum undir þá gaf ég ungu stelpunum tækifæri og hvíldi þær eldri. Það var ekkert annað að gera,“ sagði Sigurður og bætti við að þegar Valsliðið nær fimm til sex marka forskoti í síðari hálfleik á heimavelli þá sé ekki óeðlilegt að vonir andstæðinganna dofni.
Óþarflega mikill munur
„Fyrri hálfleikur var frábær. Ég er ánægður með liðið þá. Því vil ég halda til haga. Hinsvegar var munurinn óþarflega mikill þegar upp er staðið,“ sagði Sigurður Bragason þjálfari ÍBV í samtali við handbolta.is í kvöld.
Staðan í Olísdeildum og næstu leikir.
