„Varnarleikur og markvarslan í fyrri hálfleik skildi liðin að og sjö marka munur þegar hann var að baki. Sjö marka munur er mikill munur til að vinna upp,“ sagði Erlingur Richardsson þjálfari ÍBV í samtali við handbolta.is spurður hvað hefði skilið liðin að eftir tap ÍBV fyrir Haukum, 27:24, í fjórða úrslitaleiknum um Íslandsmeistaratitilinn í handknattleik karla á Ásvöllum í kvöld.
„Við komum til baka og náðum aðeins að svara fyrir okkur í síðari hálfleik og vinna þá 14:10 eftir að Haukar voru 17:10 yfir eftir fyrri hálfleik. Það var fyrst og fremst slæm byrjun sem kom okkur í koll. Við misstum boltann frá okkur á einfaldan hátt og klikkuðum á tveimur vítaköstum. Allt þetta er dýrt í úrslitaleikjum. Munurinn varð of mikill til þess að okkur tækist að vinna hann upp þrátt fyrir betri frammistöðu í síðari hálfleik,“ sagði Erlingur sem kvíðir svo sannarlega ekki úrslitaleiknum á heimavelli á miðvikudagskvöldið.
Ýmislegt hægt að gera
„Nú förum við beint heim og byrjum að leggja á ráðin fyrir úrslitaleikinn eftir tvo sólarhringa. Haukar sýndu ákveðna veikleika í dag, reyndar eins og við höfum svo sem sýnt líka. Það er ýmislegt hægt að gera og vinna úr þeirri stöðu sem er upp komin,“ sagði Erlingur sem vildi að loknum ljúka sérstöku lofsorði á frammistöðu dómara leiksins í kvöld, Bjarka Bóassonar og Gunnars Óla Gústafssonar.
