„Ég veit hreinlega ekki hvað ég á að segja, það er svo svekkjandi að tapa þessum leik. Við klúðruðum dauðfærum frá fyrstu mínútu til þeirrra síðustu og að skora aðeins sautján mörk er hreinlega ekki boðlegt,“ sagði Viggó Kristjánsson sem var eina ljósglætan í sóknarleik íslenska landsliðsins í tapleiknum gegn Tékkum í kvöld í undankeppni EM í handknattleik karla í Brno, 22:17.
„Við lékum ágæta vörn og fengum á okkur aðeins 22 mörk. Tékkar refsuðu okkur ekki mikið með hraðaupphlaupum. Að sama skapi klikkuðum við á ótrúlega mörgum færum og vorum slakir í að refsa Tékkum með mörkum eftir seinni bylgjuna,“ sagði Viggó.
„Tékkar voru ótrúlega grimmir á móti okkur frá upphafi. Þeir mættu okkur vel maður á móti manni auk þess sem stemningin í höllinni var með þeim. Tékkar spiluðu eins og þarf að gera ætli menn að vinna leik í keppni á hæsta stigi. Þá verður baráttan að vera númer eitt, tvö og þrjú,“ sagði Viggó sem sér fram á næsta leik við Tékka í Laugardalshöll á sunnudaginn.
„Ef við eigum að vinna þá viðureign verðum við að jafna metin við Tékka hvað baráttuna varðar og nýta síðan opin færi mikið betur,“ sagði Viggó Kristjánsson markahæsti leikmaður íslenska landsliðsins í samtali við handbolta.is í Brno í kvöld.
