Viktor Sigurðsson leikur ekki með Val í Olísdeildinni né í Poweradebikarnum næstu vikurnar vegna rifins liðþófa í hné. Til viðbótar meiddist Ísak Gústafsson í viðureign Vals og Selfoss í gærkvöld. Ekki er ennþá ljóst hvort meiðslin eru alvarleg.
Óskar Bjarni Óskarsson þjálfari Vals staðfesti tíðindin við handbolta.is í morgun. Viktor tók ekki þátt í leiknum við Selfoss í Olísdeildinni í gær. Hann meiddist á æfingu á dögunum.
Vonir standa til þess að Viktor komist í aðgerð til viðgerðar á liðþófanum mjög fljótlega. Gangi allt að óskum hér eftir hjá Viktori standa vonir til þess að hann mæti aftur út á völlinn eftir sex til átta vikur.
Vonandi ekkert alvarlegt
„Ísak fékk högg á annað hnéið. Vonandi er það ekkert alvarlegt. Við vonumst til að hann komist að í segulómun fljótlega. Þá skýrist staðan betur,“ sagði Óskar Bjarni Óskarsson sem stýrði Valsliðinu til stórsigurs á Selfoss, 38:21, í fyrstu viðureign liðanna í Olísdeildinni eftir rúmlega sex vikna hlé.
Tengt efni:
Það var svolítill æfingaleikjabragur yfir þessu
Mættum hreinlega ekki til leiks
Staðan og næstu leikir í Olísdeildum