Handknattleiksdeild Stjörnunnar hefur staðfest að Darija Zecevic markvörður tekur upp þráðinn með liðinu.
Zecevic lék með Stjörnunni frá 2021 til 2023 en upp úr slitnaði á milli hennar og félagsins í vor. Stefndi í að Zecevic réri á ný mið. Af því hefur ekki orðið.
Frá væntanlegri komu Zecevic til Stjörnunnar var fyrst greint í hlaðvarpsþættinum Kvennakastið á dögunum.
Líklegt er að Zecevic verði með Stjörnunni í dag þegar liðið mætir Fram í Mýrinni klukkan 16.15.
Búhnykkur fyrir Stjörnuna
Vart þarf að fjölyrða um hversu mikill búhnykkur það er fyrir Stjörnuna að fá Zecevic á ný til að standa á milli stanganna. Hún hefur verið með betri markvörðum Olísdeildarinnar undanfarin ár. Zecevic lék í eitt ár með ÍBV áður en hún flutti sig um set og gekk til liðs við Stjörnuna fyrir tveimur árum.
