„Mjög svekkjandi að tapa niður forskotinu sem við vorum loksins komnir með. Við vorum bara klaufar, lélegir. Svo áttum við skot í stöng í síðustu sókninni sem Gróttumenn nýttu sér til þess að refsa okkur með sigurmarki sínu í blálokin,“ sagði Ásgeir Örn Hallgrímsson þjálfari Hauka sem var skiljanlega vonsvikinn eftir eins marks tap fyrir Gróttu, 25:24, í Olísdeild karla í Hertzhöllinni á Seltjarnarnesi í kvöld. Haukar sitja þar með áfram í 10. sæti deildarinnar.
Haukar voru fjórum mörkum undir að loknum fyrri hálfleik en tókst að bæta leik sinn í síðari hálfleik og komust tveimur mörkum yfir, 24:22, þegar sjö mínútur voru eftir af leiktímanum.
Gátum jarðað leikinn
„Liðið var allt annað í seinni hálfleik. Ég er ánægður með þá breytingu sem varð, ekki síst varnarlega. Einnig fengum við fína markvörslu í síðari hálfleik sem var frábært. En okkur vantaði bara meiri ákveðni í að tryggja okkur sigurinn í lokin. Við fengum í tvígang möguleika á að ná þriggja marka forskoti þegar skammt var til leiksloka og ná þar með að jarða leikinn. Svo fór ekki,“ sagði Ásgeir Örn en talsverður munur var á Haukum í kvöld samanborið við sigurleikinn gegn ÍBV á síðasta laugardag.
Skref aftur á bak
„Þessi leikur var skref aftur á bak frá leiknum við ÍBV. Ljóst er eftir sem áður að mikil vinna stendur áfram fyrir dyrum hjá okkur. Staðan á okkur er þessi. Við erum bara ekki betri en raun ber vitni um,“ sagði Ásgeir Örn Hallgrímsson, þjálfari karlaliðs Hauka í samtali við handbolta.is eftir leikinn í Hertzhöllinni á Seltjarnarnesi í kvöld.
