Viggó Kristjánsson fékk högg á munninn í viðureign Íslands og Tékklands í undankeppni EM í handknattleik í gær með þeim afleiðingum að vörin sprakk. Blæddi nokkuð og mátti Elís Þór Rafnsson sjúkraþjálfari íslenska landsliðsins hafa sig allan við að stöðva blæðinguna.
Elís Þór er þrautreyndur og hefur margt séð á meira en tveggja áratuga starfi sínu með íslenska landsliðinu og Haukum. Tókst honum að koma böndum yfir blæðinguna af sinni alkunnu yfirvegun sem Viggó er svo sem einnig þekktur fyrir.
Viggó verður vonandi klár í slaginn með Leipzig í þýsku deildinni á fimmtudaginn þegar hann mætir Ými Erni Gíslasyni og félögum Rhein-Neckar Löwen.
Viggó skoraði sex mörk í sigurleiknum á Tékkum í gær, 28:19, og skapaði fimm marktækifæri.
Ljósmyndarinn Hafliði Breiðfjörð var með fingur á púlsinum eins og hans er von og vísa og náði meðfylgjandi myndum af Viggó og aðgerðum Elísar Þórs. Smellið á hverja mynd fyrir til að sjá hana stærri.
