Nýliðar Olísdeildar kvenna, Afturelding, hafa krækt í línukonuna Stefaníu Ósk Engilbertsdóttur, frá hinum nýliðum deildarinnar ÍR. Stefanía Ósk hefur leikið með Aftureldingu í tveimur síðustu leikjum liðsins, gegn Gróttu í UMSK-mótinu og á móti Stjörnunni á Ragnarsmótinu á Selfossi í gær.
Stefanía Ósk hefur leikið með ÍR árum saman og verið ein að kjölfestum liðsins sem hefur sótt verulega í sig veðrið síðustu árin.
„Það er ekki langt síðan Stefanía byrjaði að æfa með okkur,“ sagði Guðmundur Helgi Pálsson þjálfari Aftureldingar ánægður með nýjustu viðbótina í leikmannahópi sínum. Stefanía Ósk skoraði m.a. sjö mörk í leiknum við Stjörnuna í gær.
Mikill metnaður ríkir í kringum kvennaliði Aftureldingar og stefnan hiklaust tekin á að festa liðið í sessi í Olísdeildinni eftir kaflaskipt gengi með ferðum upp og niður úr Olísdeildinni undanfarin ár.
Auk Stefaníu Óskar hafa Saga Sif Gísladóttir, markvörður, og Hildur Lilja Jónsdóttir gengið til liðs við Aftureldingu í sumar.
Nánar hægt að skoða helstu félagaskipti sumarsins í fréttinni hér fyrir neðan.
